„ქართული ოცნების“ წევრის, ზაქარია ქუცნაშვილის განცხადებით, პრეზიდენტ გიორგი მარგველაშვილის შეფასება, რომ „გაზპრომთან“ ხელშეკრულების გაფორმების შედეგად, ენერგოსექტორი გაუარესდება, არასწორი ფრაზაა.

როგორც ქუცნაშვილმა „ექსპრესნიუსთან“ საუბარში განმარტა, ენერგოსექტორი დივერსიფიცირებულია და ენერგიის წყაროებსა და სისტემებზეა დამოკიდებული.

დეპუტატი „გაზპრომის“ საკითხზე გიორგი მარგველაშვილის დღევანდელ შეფასებას აბსტრაქტულს უწოდებს.

"პრეზიდენტის შეფასება, რომ ენერგოსექტორი გაუარესდება - ეს არასწორი ფრაზაა, იმიტომ რომ ენერგოსექტორი დივერსიფიცირებულია და ენერგიის წყაროებსა და სისტემებზეა დამოკიდებული. რა აქვს პრეზიდენტს მხედველობაში?! რას გულისხმობს ენერგოსისტემის გაუარესებაში?! ნავთობსადენების სისტემაზე აქვს ლაპარაკი, ელექტრომომარაგების სისტემაზე, გაზმომარაგების სისტემებზე, შიდა ქსელებზე თუ რაზე? ეს ძალიან ზოგადი ფრაზაა. შენიშვნა იმით განსხვავდება მოსაზრებისაგან, რომ შენიშვნა არ შეიძლება იყოს ზოგადი, არამედ კონკრეტული შინაარსის მატარებელია. სხვანაირად შენიშვნას ფასი არ აქვს. მისი შენიშვნა აბსტრაქტული შინაარსის არის. კონსტიტუციაში ზედმიწევნით არის გაწერილი, რომ მთავრობა არ არის  ვალდებული პრეზიდენტთან კონსულტაციები გაიაროს", - განაცხადა ქუცნაშვილმა.

ამასთან, დეპუტატმა „გაზპრომთან“ გაფორმებული ხელშეკრულებაც შეაფასა და აღნიშნა, რომ მსოფლიო სავაჭრო ორგანიზაციაში გაწევრიანებული ქვეყნები, ვალდებულები არიან, შესაბამისი წესებით ითამაშონ.

"საქართველო მსოფლიო სავაჭრო ორგანიზაციაში რუსეთის გაწევრიანებაზე არ თანხმდებოდა, რადგან რუსეთის ფედერაცია მსოფლიო ვაჭრობის წესებს არ იცავდა. ეს გამოიხატებოდა იმაში, რომ რუსეთმა ქართულ ღვინოსა და მთელი რიგი სოფლის მეურნეობის პროდუქციაზე ემბარგო დააწესა. ამასთან, მათი გაწევრიანებისთვის, ყველა ჩართული ქვეყნის თანხმობა იყო საჭირო. რუსეთი იძულებული გახდა, ქართული პროდუქციისთვის ბაზარი გაეხსნა. ამის შემდეგ რუსეთმა თქვა, თუ მსოფლიო ვაჭრობის წესებზე გველაპარაკებით, მაშინ ამ შემთხვევაში სატრანზიტო პუნქციის შესრულებისას გადახდა უნდა მოხდეს არა ნატურით, არამედ ფულადი ანაზღაურებით", - განაცხადა ქუცნაშვილმა.

საპარლამენტო უმრავლესობის წევრის განმარტებით, საქართველოსთვის "გაზპრომისგან' ტრანზიტის საფასურის მიღება ნატურით უკეთესია, თუმცა ქვეყანას კომპანიის პირობებზე დათანხმება მოუწია.

"რა თქმა უნდა ჩვენთვის უფრო მომგებიანი იყო რუსეთიდან ანაზღაურების ნატურით მიღება, რადგან აზერბაიჯანიდან ვიღებდით მხოლოდ 5%-ს გატარებული გაზიდან, მაშინ როდესაც რუსეთის მიერ გატარებული გაზის 10% იყო ჩვენი. საბოლოო ჯამში მოგვიწია ამ პირობებზე დათანხმება, მაგრამ, ეს რა ეკონომიკური ზიანის მომტანი იქნება ამას დათვლა სჭირდება. გარწმუნებთ, რომ საქართველოს მთავარი გაზმომარაგება დამოკიდებული არ არის ჩრდილოეთ-სამხრეთის გაზსადენზე", - აღნიშნა ქუცნაშვილმა.

ცნობისთვის, პრეზიდენტი მიიჩნევს,რომ  ამ ხელშეკრულებაზე ხელმოწერით გაუარესდა ქვეყნის ენერგოსექტორი და საქართველოს პოლიტიკური და ეკონომიკური ინტერესები დაზიანდა.

შეგახსენებთ, რომ საქართველოს მთავრობამ სომხეთში ბუნებრივი აირის ტრანზიტთან დაკავშირებით, „გაზპრომ-ექსპორტის“ საბოლოო წინადადება განიხილა და მასთან ხელშეკრულების გაფორმების გადაწყვეტილება მიიღო.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ოპოზიციურმა ალიანსმა პატიმრების ოჯახებისთვის თანხების შეგროვების კამპანიის დაწყების შესახებ განაცხადა.

გვარამიამ საქართველოში ახალი საპროტესტო აქციები და „ახალი რეალური არჩევნები“ დააანონსა

ზელენსკი: უკრაინა მზადაა საქართველოსთან ორმხრივად სასარგებლო ურთიერთობებისთვის

უკრაინის საგარეო საქმეთა მინისტრმა ეუთოს საგანგებო შეხვედრაზე საქართველოს მხარდაჭერისთვის მადლობა გადაუხადა.