იაპონიაში ძლიერი მიწისძვრაა

2016-04-14 19:42:08, 1154 ნახვა

მსოფლიო

იაპონიის სამხრეთით, კუნძულ კიუსიუზე ძლიერი მიწისძვრა მოხდა, - ამის შესახებ BBC იუწყება.

როგორც მედია საშუალება იტყობინება, მიწისძვრა ადგილობრივი დროით 21:26 საათზე მოხდა. ეპიცენტრი ქალაქ მაშიკთან იყო, რომელიც კუმამოტოს პრეფექტურაში მდებარეობს. მიწისძვრის სიმძლავრემ 6,2 მაგნიტუდა შეადგინა. არიან გარდაცვლილები და დაშავებულები, თუმცა მათი რაოდენობა ჯერ უცნობია.

ადგილობრივი მედია შენობებში ხანძრების შესახებაც იუწყება.

მიწისძვრის შედეგად, ცუნამის საშიშროება არ არსებობს. იაპონიის ზოგიერთ სარკინიგზო ხაზზე მატარებლების მოძრაობა შეჩერდა. ატომურ ელექტროსადგურებზე „გენკაისა“ და „სენდაიზე“ შემოწმება მიმდინარეობს. აღნიშნული სადგურები კუნძულ კიუსიუზეა განთავსებული.

მიწისძვრის გამო ქვეყნის პრემიერ-მინისტრის კანცელარიაში საგანგებო შტაბი შეიქმნა. სინძო აბემ ქვეყნის მოსახლეობის უსაფრთხოებისთვის აუცილებელი ზომების გატარების განკარგულება გასცა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან