2016-03-29 22:50:49, 737 ნახვა

---

პროკურატურა: მაჭავარიანისთვის არავის გაუგზავნია შეტყობინება პირადი ცხოვრების ამსახველი კადრების გავრცელებასთან დაკავშირებით

პროკურატურა ვანო მაჭავარიანის დაკითხვასთან დაკავშირებით განცხადებას ავრცელებს. განცხადებაში ნათქვამია, რომ მაჭავარიანისთვის არავის გაუგზავნია შეტყობინება პირადი ცხოვრების ამსახველი კადრების გავრცელებასთან დაკავშირებით.

"ექსპრესნიუსი" პროკურატურის განცხადებას უცვლელად გთავაზობთ:

"გამოკითხვისას გაირკვა, რომ მისთვის არავის გაუგზავნია შეტყობინება პირადი ცხოვრების ამსახველი კადრების გავრცელებასთან დაკავშირებით და მას არ უნახავს მსგავსი სახის ვიდეომასალა.

"ი. მაჭავარიანმა აღნიშნა მხოლოდ ის, რომ 2016 წლის 18 მარტს პირად facebook გვერდზე ათვალიერებდა ე.წ  აქტივობის კედელს, რა დროსაც შეამჩნია მისთვის უცნობი ჯგუფის სახელით გაზიარებული ე.წ. ლინკი, რომელიც დასათაურებული იყო „სკანდალური კადრების“ სახელით. მას არ უნახავს ხსენებული კადრები, ვინაიდან თვლიდა, რომ იქნებოდა კომპიუტერული ვირუსის შემცველი და, შესაბამისად, არ იცის ამ კადრების შინაარსი.

"რაც შეეხება მის facebook გვერდზე, მისივე განცხადებით, განხორციელებულ ე.წ. ჰაკერული თავდასხმის ფაქტს, აღნიშნულთან დაკავშირებით ი. მაჭავარიანმა აღნიშნა, რომ რამოდენიმე დღის წინ გაეგზავნა მისივე ფოტოს გამოყენებით შექმნილი facebook გვერდიდან მეგობრობის თხოვნა, რაც მისი მხრიდან აღქმული იქნა ჰაკერულ თავდასხმად. აღნიშნულის შესახებ ი. მაჭავარიანმა აცნობა facebook-ის ადმინისტრაციას, რამაც, მისი ვარაუდით, გამოიწვია facebook პროფილის დროებითი დაბლოკვა.

"ამასთან, ი. მაჭავარიანმა უარი განაცხადა მასთან ერთად მისი კუთვნილი facebook გვერდის დათვალიერებაზე.

"ამდენად, ი. მაჭავარიანის გამოკითხვით დადგინდა, რომ მას პირადი ცხოვრების ამსახველი კადრების მოპოვება-გავრცელებასთან დაკავშირებით ინფორმაცია არ გააჩნია და მის მიერ საჯაროდ გაკეთებული განცხადებები ეფუძნება მხოლოდ მის ვარაუდებს.

"საზოგადოებას შევახსენებთ, რომ მთავარი პროკურატურა ინტენსიურ რეჟიმში აგრძელებს გამოძიებას პირადი და ოჯახური საიდუმლოს ხელყოფის ფაქტებზე დაწყებული სისხლის სამართლის საქმის ფარგლებში ხსენებულ დანაშაულთან კავშირში მყოფი პირების გამოსავლენად. საქართველოს პროკურატურა საზოგადოებას დამატებით მიაწვდის ინფორმაციას გამოძიების შედეგების შესახებ," - ნათქვამია განცხადებაში. 

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი