„თანაინვესტირების ფონდის“ ყოფილი გენერალური დირექტორი, გიორგი ბაჩიაშვილი, სასამართლო სხდომას დისტანციურად დაესწრება. როგორც მისმა ადვოკატმა, ლევან მახარაშვილმა განაცხადა, დღევანდელ სხდომაზე ბაჩიაშვილი მოსამართლეს დეტალურ ჩვენებას მისცემს მომხდარ ფაქტთან დაკავშირებით. 

„სასამართლო სხდომაზე დავაყენებთ შუამდგომლობას, რომ გიორგი ბაჩიაშვილმა ჩვენება დისტანციურად მისცეს და იმედი მაქვს, რომ ამ შუამდგომლობას მოსამართლე დააკმაყოფილებს. სასამართლო კი რეალურ ჩვენებას მოისმენს მომხდარი ფაქტის შესახებ. რაც შეეხება დისტანციურად ჩართვას, იმის გათვალისწინებით, რომ მისი ადგილმდებარეობა უცნობია, ტექნიკურად პრობლემა ვერ იქნება, რადგან ეს ელექტრონულად მოხდება. მოსამართლე ვალდებულია ჩვენს მიერ წაყენებული შუამდგომლობა დააკმაყოფილოს, გიორგი ბაჩიაშვილის დისტანციურად გამოკითხვასთან დაკავშირებით, რადგან ეს კანონით არის გათვალისწინებული და თან გვქონია პრეცედენტები, როდესაც გამოსაკითხმა პირებმა სასამართლოს ჩვენება ონლაინ რეჟიმში მისცეს,“ - აღნიშნა ადვოკატმა. 

გარდა ამისა, მახარაშვილმა განმარტა, რომ მიუხედავად იმისა, დღევანდელი სხდომა ბაჩიაშვილის საზღვრის უკანონო კვეთას ეხება, გამორიცხული არ არის, რომ ბრალდების მხარე პატიმრობის გამოყენებას მოითხოვოს. თუმცა, მისი თქმით, ბაჩიაშვილს უკვე აქვს შეფარდებული პატიმრობა სხვა ბრალდებისათვის, რის შედეგადაც, განმეორებითი პატიმრობის მოთხოვნის საფუძველი არ არსებობს. 

გიორგი ბაჩიაშვილისთვის წარდგენილი ბრალდება 2017 წელს განხორციელებულ ქმედებას ეხება. პროკურატურის ინფორმაციით, ბაჩიაშვილმა ინვესტორს ჩადებული ინვესტიციიდან მიღებული სრული მოგების სანაცვლოდ მხოლოდ 536 900 აშშ დოლარი გადასცა, ხოლო დარჩენილი 8986 ბიტკოინი მართლსაწინააღმდეგოდ მიითვისა, რომლის ღირებულება დაახლოებით 43 მილიონი აშშ დოლარი იყო. 

ბაჩიაშვილი ბრალდებებში თავს დამნაშავედ არ მიიჩნევს. მას აღნიშნულ საქმეზე 2 500 000-ლარიანი გირაო აქვს შეფარდებული, ასევე დაწესებული აქვს დამატებითი შემზღუდავი ღონისძიებები. ბრალდება, რომელიც ბაჩიაშვილს აქვს წაყენებული, 9-დან 12-წლამდე თავისუფლების აღკვეთას ითვალისწინებს. 

გიორგი ბაჩიაშვილს ასევე ბრალი წაყენებული აქვს "მტკვარი ჰესისა" და საზღვრის უკანონო კვეთის საქმეზე. 

ავტორი: ექსპრესნიუსი,

სოციალური ქსელები

დიდი ხნის შემდეგ პირველად, რუსული არმია ზაპორიჟიესა და დნიპროპეტროვსკის მიმართულებებიდსნ უკან იხევს

ამერიკელი მედიამაგნატი Vogue, The New Yorker,-ს მფლობელი დონალდ ნიუჰაუსი 96 წლის ასაკში გარდაიცვალა

თბილისის მერია სიონის ტაძარში რეაბილიტაციის პროექტს იწყებს

საქართველოს ქალაქებში სამხედრო ტექნიკის გამოფენა გაიმართა