ამერიკაში მოღვაწე ცნობილი ავიაკონსტრუქტორის, ალექსანდრე ქართველის დაბადების დღეზე თბილისში ავიაციის კვირეული წელსაც გაიხსნება.

თავდაცვის სამინისტროს ინფორმაციით, ღონისძიება 9 სექტემბერს დაიწყება და 19 სექტემბრამდე გაგრძელდება. სწორედ, ავიაციის კვირეულის საორგანიზაციო საკითხები და უცხოეთში მოღვაწე ქართველი სამხედროების პოპულარიზაცია იყო მთავარი თემები დღეს თავდაცვის სამინისტროში გამართულ შეხვედრაზე. თინათინ ხიდაშელმა "ალექსანდრე ქართველის საერთაშორისო საზოგადოების" პრეზიდენტსა და ორგანიზაციის სხვა წარმომადგენლებს უმასპინძლა.

„საორგანიზაციო შეხვედრა გვქონდა ფონდის წარმომადგენლებთან. ბევრ ახალ ინიციატივაზე შევთანხმდით. მომავალი წელი საიუბილეოა, 120 წელი უსრულდება დიდი ქართველ გამომგონებელს და შესაბამისად გვინდა, რომ განსაკუთრებულად აღვნიშნოთ. წლევანდელ კვირეულს გამოვიყენებთ იმისთვის, რომ 2016 წლის ღონისძიებისთვის მეტი პარტნიორი მოვიზიდოთ და მეტი ინიციატივები გავახმოვანოთ. შევთანხმდით, რომ თავდაცვის სამინისტრო მაქსიმალურ პოპულარიაზაციას გაუწევს ალექსანდრე ქართველის სახელს შემოდგომაზე დაგეგმილი საერთაშორისო უსაფრთხოების კონფერენციის ფარგლებში. გვსურს, რომ ავიაშოუ დავამთხვიოთ ამ კონფერენციის გახსნას, იქ წარმოდგენილ უცხოელ პარტნიორებს გავაცნოთ ალექსანდრე ქართველი და ვიამაყოთ მისი სახელით“,- განაცხადა თავდაცვის მინისტრმა და აღნიშნა, რომ თავდაცვის სამინისტრო სამხედრო მუზეუმის მოწყობის საკითხზე მუშაობს და ეს მუზეუმი უცხოეთში მოღვაწე ქართველების პოპულარიზაციის კიდევ ერთი საშუალება იქნება.

"ალექსანდრე ქართველის საერთაშორისო საზოგადოების" პრეზიდენტმა ლელა ქართველიშვილმა თინათინ ხიდაშელს ორგანიზაციის მიზნები დეტალურად გააცნო და თავდაცვის სამინისტროსთან შემდგომი თანამშრომლობის მზადყოფნა გამოთქვა.

„დიდი მხარდაჭერა გვაქვს მინისტრისგან და მადლიერები ვართ ამის გამო. ალბათ ერთობლივად შევქმნით საკოორდინაციო კომისიას, რომელიც შესაბამის საკითხებს განიხილავს, განვახორციელებთ დასახულ მიზნებს და მოვემზადებით ალექსანდრე ქართველის 120 წლის იუბილესთვის, რომელიც 2016 წელს გაიმართება. ალექსანდრე ქართველის იუბილესთან დაკავშირებულ ღონისძიებებში აქტიურად არის ჩართული ამერიკული მხარეც“,- განაცხადა ლელა ქართველიშვილმა.

აშშ-ში მოღვაწე ქართველ ავიაკონსტრუქტორ ალექსანდრე ქართველი (ქართველიშვილი) აშშ-ის სამხედრო და აკადემიურ წრეებში ავიაციის ლეგენდად მიიჩნევენ. მის სახელს უკავშირდება 14 ამერიკული სამხედრო-საბრძოლო თვითმფრინავის შექმნა. ალექსანდრე ქართველი აშშ-ის ატომური კომიტეტის წევრი იყო, მუშაობდა NASA-ს გასაიდუმლოებულ და მთვარის პროექტებზე. მის მიერ შექმნილი პროექტები დღემდე ხორციელდება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

რუსეთი სომხეთიდან ხილისა და ბოსტნეულის იმპორტს ზღუდავს

ირანის ელჩმა ყაველაშვილს თბილისის მეჩეთის მონახულების გამო მადლობა გადაუხადა

კალაძე გორში მომხდარ ძალადობაზე: ფაქტი არის ძალიან მძიმე - მნიშვნელოვანია, რომ შესაბამისმა სამსახურებმა რეაგირება მოახდინეს

კალაძე: ოპოზიციაში მიდის ბრძოლა - ვის ერქმევა მთავარი ოპოზიციური პარტია