ევროპის საბჭოს ჟურნალისტთა უსაფრთხოების პლატფორმამ ევროპაში მედიის თავისუფლების შესახებ ყოველწლიური ანგარიში გამოაქვეყნა, რომელშიც საქართველოზეც არის საუბარი.

კერძოდ, ანგარიშში ხაზგასმულია, რომ საქართველოში "ვითარება საგანგაშო ტემპით გაუარესდა". აღნიშნულია, რომ ქვეყანაში მედიის თავისუფლებისთვის შექმნილი საფრთხეების გამო გამოქვეყნებული განგაშის სიგნალების რაოდენობა 2024 წელთან შედარებით 78%-ით გაიზარდა.

"ეს სიგნალები ასახავს პრესის თავისუფლების ფართომასშტაბიან ნგრევას, რომელიც გამოწვეულია ინსტიტუციური რეპრესიებით, პოლიტიზებული სამართალდამცავი სტრუქტურებით, სახელმწიფო ინსტიტუტებისა და საზოგადოებრივი მაუწყებლის დაქვემდებარებით და ეფექტური ბალანსისა და კონტროლის მექანიზმების შესუსტებით", - ვკითხულობთ ანგარიშში.

ანგარიშში საუბარია ბათუმელებისა და ნეტგაზეთის დამფუძნებლის მზია ამაღლობელის უკანონო პატიმრობაზე და ხაზგასმულია, რომ მზია ამაღლობელის დაკავების შემდეგ მისი მედიაორგანიზაციები დისკრედიტაციის კამპანიების, დამამცირებელი მოპყრობისა და ეკონომიკური ზეწოლის სამიზნე გახდნენ.

ამასთან, ნათქვამია, რომ მზია ამაღლობელის საქმე პრესის თავისუფლებისა და დემოკრატიისთვის ბრძოლის სიმბოლოდ იქცა.

გარდა ამისა, ვკითხულობთ, რომ მზია ამაღლობელმა თავისი კარიერის განმავლობაში "გამოიჩინა სამაგალითო სიმამაცე და ურყევი ერთგულება დემოკრატიული ღირებულებების, პრესის თავისუფლებისა და ჟურნალისტთა უფლებების დაცვის მიმართ". 

ანგარიშში ასევე საუბარია ქართული ოცნების მიერ მიღებულ რეპრესიულ კანონმდებლობაზეც და ნათქვამია, რომ 2025 არაერთი რეპრესიული კანონი იქნა მიღებული, მათ შორის საუბარია ე.წ. FARA-ს კანონზე, გრანტების შესახებ კანონსა და მაუწყებლობის შესახებ კანონებში ცვლილებებზე. ხაზგასმულია ისიც, რომ ახალი ნორმების საფუძველზე ტელეკომპანია ფორმულასა და TV პირველის წინააღმდეგ უკვე შეტანილია საჩივრები.

გარდა მედიისა, ანგარიშში ნახსენებია არასამთავრობო ორგანიზაციების წინააღმდეგ ზომებიც - კერძოდ, საუბარია რამდენიმე NGO-სთვის, მათ შორის მედიის თავისუფლებაზე მომუშავე ჯგუფებისთვის საბანკო ანგარიშების გაყინვაზე. ნახსენებია ცვლილებებიც, რომლის თანახმადაც, ჟურნალისტებს სასამართლოებში ფოტო-ვიდეო გადაღება და აუდიოჩანაწერების ჩაწერა აეკრძალათ სასამართლოს სპეციალური ნებართვის გარეშე.

როგორც ანგარიშში ვკითხულობთ, გრძელდება შეშფოთება საქართველოს საზოგადოებრივი მაუწყებლის სარედაქციო დამოუკიდებლობასთან დაკავშირებით - ნახსენებია 2025 წლის ევროკომისიის გაფართოების პოლიტიკის ანგარიში, სადაც ნათქვამია, რომ საზოგადოებრივი მაუწყებელი არ არის დამოუკიდებელი და ხელს უწყობს ანტიევროპულ რიტორიკას.

დოკუმენტში ასევე ნახსენებია პოლიციის მხრიდან ჟურნალისტებზე ფიზიკური ანგარიშსწორება და კვლავ არის ხაზგასმული ის, რომ დანაშაულზე პასუხისმგებელი პირების დაუსჯელობა კვლავ ფართოდ გავრცელებულია.

ანგარიშში ვკითხულობთ, რომ მიუხედავად უპრეცედენტო ზეწოლისა, დამოუკიდებელი ჟურნალისტები აგრძელებენ მუშაობას, თუმცა აღნიშნულია, რომ ეფექტური კონტროლის მექანიზმებისა და დამოუკიდებელი ინსტიტუტების არარსებობის პირობებში, საერთაშორისო მხარდაჭერის გარეშე საქართველოში ჟურნალისტიკის მდგრადობა სერიოზული საფრთხის წინაშე დგას.

ავტორი: ექსპრესნიუსი,

სოციალური ქსელები

ბრიტანეთის მიერ დასანქცირებული ქართული კომპანიების წინააღმდეგ გამოძიება დაიწყო

თიბისი კონცეპტი წარმოგიდგენთ თბილისის საერთაშორისო თეატრალურ ფესტივალს

კალაძე: ორი წლის წინ რეაბილიტირებულ მეტროსადგურ „ავლაბარში“ წყალი ისე ჩადიოდა, როგორც გარეთ, შეისწავლეთ საკითხი

Washington Post: აშშ-ს ყოფილი მოკავშირე საქართველო ირანის ორბიტაზე ექცევა