გვჭირდება დაუყოვნებლივი და მაქსიმალური გლობალური პასუხი რუსეთის ტერორზე,- ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

ზელენსკი მოუწოდებს საერთაშორისო ორგანიზაციებსა და ყველა სახელმწიფოს, ჰქონდეთ რეაგირება ეკოციდის ფაქტზე, რომელიც რუსმა ოკუპანტებმა კახოვკის ჰიდროელექტროსადგურის აფეთქებით ჩაიდინეს.

„მივმართავ მსოფლიოში ყველას, ვინც სიცოცხლეს აფასებს, დღეს უკრაინის მიწაზე რუსმა ოკუპანტებმა ჩაიდინეს ეკოციდის ყველაზე დიდი დანაშაული და არა მხოლოდ ამ ომის დროს, არამედ ათწლეულების განმავლობაში.

ფაქტობრივად, განადგურდა კახოვკის წყალსაცავი, ერთ-ერთი უდიდესი უკრაინაში. 18 მილიარდი კუბური მეტრი წყალი.

კახოვკის ჰიდროელექტროსადგურის ყველა სტრუქტურა, მისი კაშხალი ოკუპირებულ ტერიტორიაზე იყო რუსი დამპყრობლების სრული კონტროლის ქვეშ.

ჯერ კიდევ გასული წლის შემოდგომაზე გვქონდა ინფორმაცია კახოვკის ჰიდროელექტროსადგურის კაშხლის დამპყრობლების მიერ დანაღმვის შესახებ. განზრახ გააკეთეს. პირველ რიგში, მსოფლიოს შანტაჟი. მეორე, კაშხლის აფეთქება და წყალდიდობის იარაღად გამოყენება. ეს არის ზუსტად ის, რაც მოხდა.

წყალდიდობის ზონაში შედის ის ადგილები, სადაც ომამდე 100 ათასზე მეტი ადამიანი ცხოვრობდა. ახლა იქ სულ მცირე ათიათასობით ადამიანი რჩება. დატბორილი ტერიტორიიდან მოსახლეობის ევაკუაცია გრძელდება - საფრთხის ქვეშაა თითქმის 80 დასახლება.

დღეის მდგომარეობით, რამდენიმე რამ ნათელია. ჯერ ერთი, ეკოციდის ასეთი დანაშაული უბრალოდ კაშხლის დაბომბვით არ შეიძლებოდა მომხდარიყო. მის გასანადგურებლად რუსულ ძალებს მიზანმიმართულად უნდა ემოქმედათ. მეორეც, მსოფლიოში არც ერთი ქვეყანა არ უნდა დარჩეს მარტო ამ ტერორის წინააღმდეგ და მადლობელი ვარ ყველას, ვინც უკრაინას ეხმარება! მესამე, ჩვენ გვჭირდება დაუყოვნებლივი და მაქსიმალური პასუხი რუსეთის ტერორზე. გაეროს უშიშროების საბჭოდან ყველა საერთაშორისო ინსტიტუტამდე, ყველა სახელმწიფოს, ყველა ლიდერის. რუსმა ტერორისტებმა უნდა დატოვონ ჩვენი მთელი ტერიტორია, რომლის ყოველი მეტრის გამოყენებას ცდილობენ ბოროტებისა და კატასტროფებისთვის. რაც უფრო სწრაფად მოხდება დეოკუპაცია, მით უფრო სწრაფად მოვა უსაფრთხოება.

ტერორისტების მიერ კაშხლის განზრახ განადგურება მსოფლიოს ყველა კუთხიდან ერთნაირად გამოიყურება. აფრიკისთვის, ევროპისთვის, შეერთებული შტატებისთვის, ჩინეთისთვის, ავსტრალიისთვის და ინდოეთისთვის ადამიანის მიერ შექმნილი კატასტროფები ბოროტებაა.

ჩვენ უნდა შევაჩეროთ რუსული ბოროტება. მსოფლიოს ყველა სხვა ტერორისტმა უნდა დაინახოს, რომ ტერორი ისჯება მსოფლიოს მიერ“,- განაცხადა ზელენსკიმ.

ცნობისთვის, უკრაინის შეიარაღებული ძალების სამხრეთის ოპერატიულმა სარდლობამ გუშინ, 6 ივნისს გაავრცელა ინფორმაცია, რომლის მიხედვითაც, რუსმა ოკუპანტებმა, ადგილობრივი დროით 02:50 საათზე, კახოვკის ჰიდროელექტროსადგური ააფეთქეს.

მომხდარის შედეგად, ხერსონის ოლქის მარჯვენა სანაპიროზე, კრიტიკულ ზონაში, ათასობით ადამიანი აღმოჩნდა. რაც შეეხება რუსების მიერ დროებით ოკუპირებულ მარცხენა სანაპიროს, რელიეფის სიდაბლის გამო, ის კიდევ უფრო დიდი რისკის წინაშე დგას. დასახლებული პუნქტების დატბორვის საფრთხის გამო, შინაგან საქმეთა სამინისტრომ მალევე დაიწყო მოსახლეობის ევაკუაცია, რომელიც ამ დრომდე მიმდინარეობს.

აფეთქებიდან პირველ საათებში წყალმა მთლიანად ან ნაწილობრივ დატბორა 8 დასახლება და ხერსონის ერთი მიკრორაიონი მარჯვენა სანაპიროზე. ჰიდროელექტროსადგურის ნგრევის გამო, მდინარე დნეპრი, სულ მცირე, 150 ტონა ძრავის ზეთით დაბინძურდა.  

უკრაინის მთავარმა ჰიდროენერგო კომპანია Ukrhydroenergo-მა გუშინვე განაცხადა, რომ ჰიდროელექტროსადგური, სამანქანე განყოფილების აფეთქების გამო, მთლიანად დანგრეულია და აღდგენას არ ექვემდებარება. 

აღსანიშნავია, რომ კახოვკის ჰიდროელექტროსადგური სამხრეთ უკრაინას ელექტროენერგიითა და სუფთა წყლით ამარაგებდა. აღნიშნული სადგური ასევე მნიშვნელოვანი იყო ზაპოროჟიეს ატომური ელექტროსადგურის მუშაობისთვის, რადგან მისი გაგრილების აუზების სიმძლავრე დამოკიდებულია დნეპრში წყლის დონეზე.

რაც შეეხება აფეთქებაში რუსეთის მონაწილეობას, კრემლმა მომხდარს "დაგეგმილი დივერსიის შედეგი" უწოდა, მასში რუსი ჯარისკაცების მონაწილეობა უარყო და "დივერსიის ავტორად" უკრაინა დაასახელა.

ავტორი: ექსპრესნიუსი,

სოციალური ქსელები

ევროკავშირმა სანქციები დააწესა ოთხი ორგანიზაციისა და სამი ისრაელელი „ექსტრემისტი მკვიდრის“ წინააღმდეგ

წულუკიანი გორზე: ამ საზარელმა კადრებმა დაგვიდასტურა, რომ მტერი მეტი გვყავს, ვიდრე გვეგონა

გორში, პოლიციის განყოფილებასთან ხმაურია - ვიდეო

გიგა ავალიანის საქმეზე ბრალდება კიდევ ორ პირს წარედგინა, დაკავებულია ირაკლი სულაბერიძე და დემეტრე კასრაძე