ღაზას სექტორში შეტაკებებია - არის მსხვერპლი

2019-07-27 12:07:46, 4257 ნახვა

მსოფლიო

ღაზას სექტორში შეტაკებები გრძელდება, რის შედეგადაც ერთი პალესტინელი დაიღუპა, 40 კი, დაშავდა, - ამის შესახებ Euronews იუწყება.

მედია საშუალების ინფორმაციით, შეტაკებებში ათასობით ადამიანი მონაწილეობდა. ისრაელის არმიაში აცხადებენ, რომ პალესტინელები მათი მიმართულებით სხვადასხვა საგნებს, მათ შორის ასაფეთქებელ მოწყობილობებს ისროდნენ, რის გამოც მათ საპასუხო ზომების მიღება მოუწიათ. ისრაელის არმიაში განმარტავენ, რომ ყველა ზომა კანონიერი იყო.

მედიის ცნობით, შეტაკებების დროს დაზიანდა სამხედრო ავტომობილი, თუმცა ჯარისკაცები ამ დროს არ დაშავებულან.

ცნობისთვის, ისრაელ-ღაზას საზღვარზე ვითარება მას შემდეგ დაიძაბა, რაც პალესტინელებმა ე.წ. დაბრუნების მარში მოაწყვეს. 31 მარტს დაწყებული აქცია მოძრაობა "ჰამასის" მიერ იყო ორგანიზებული. პროტესტის ტალღა იერუსალიმში ამერიკის საელჩოს გადატანამ გამოიწვია. მას შემდეგ, საზღვარზე, ყოველ პარასკევს "დაბრუნების მარშის" ფარგლებში აქცია იმართება. აქციების დროს ისრაელის არმიასა და პალესტინელებს შორის შეტაკებები იწყება. 4 თვის განმავლობაში ამ შეტაკებების გამო ღაზას სექტორში 307 ადამიანი დაიღუპა.

Patreon P მხარი დაუჭირე "ექსპრესნიუსს" →

ავტორი: ლუკა ცარციძე, ექსპრესნიუსის რეპორტიორი 2019 წლიდან