"პარლამენტის თავმჯდომარის სკამში უნდა ჩამჯდარიყო რუსი დეპუტატი, რომ ხელისუფლება გამოფხიზლებულიყო?!" - ამის შესახებ "ევროპული საქართველოს" ერთ-ერთმა ლიდერმა გიგი უგულავამ პარლამენტის წინ მიმდინარე აქციაზე განაცხადა, სადაც რუსი დეპუტატების ვიზიტს აპროტესტებენ.

როგორც დეპუტატმა განაცხადა, აღნიშნული ფაქტი უკვე წყალგამყოფია.

"მაინცდამაინც პარლამენტის თავმჯდომარის სკამში უნდა ჩამჯდარიყო რუსი დეპუტატი, რომ ხელისუფლება გამოფხიზლებულიყო?! ამას ჰქვია სრული უპატრონობა და ასე ნელ-ნელა ვაბარებთ ქვეყანას რუსეთს. ეს უკვე წყალგამყოფია, ან იქით ხარ ან აქეთ ხარ. ჩამოყალიბდეს ეს ხალხი უმრავლესობაში, მერე რომ მოთქვამს, უიმე დედა გავრილოვის პარლამენტის თავმჯდომარის სკამზე დაჯდომა არ შეიძლება, მაგრამ რესტორანში ტაშფანდურს რომ უმართავენ ეგ კი", - აღნიშნა გიგი უგულავამ.

შეგახსენებთ, თბილისში მართლმადიდებლური საპარლამენტთაშორისო ასამბლეა იმართებოდა, რომელსაც ანტიქარტული რიტორიკის მქონე რუსი დეპუტატი სერგეი გავრილოვიც ესწრებოდა. ასამბლეა გუშინ სახელმწიფო ცერემონიების სასახლეში გაიხსნა. აღნიშნულმა ფაქტმა ქართულ საზოგადოებაში პროტესტი გამოიწვია. მოქალაქეებმა ყოფილ პრეზიდენტის რეზიდენციასთან აქცია გამართეს და რუსი დეპუტატები სირცხვილის კორიდორში გაატარეს. დღეს ასამბლეამ პარლამენტში გადაინაცვლა. აღსანიშნავია, რომ მას ხსენებული გავრილოვი უძღვებოდა. დეპუტატმა პარლამენტის თავმჯდომარის ირაკლი კობახიძის სავარძელიც დაიკავა. ამან "ევროპული საქართველოს" და "ნაციონალური მოძრაობის" გაღიზიანება გამოიწვია. მათ გავრილოვის მიერ სხდომის ჩატარება გააპროტესტეს, რის შემდეგაც ასამბლეა შეწყდა.

ავტორი: ელენე გვიმრაძე, ექსპრესნიუსის რეპორტიორი 2018 წლიდან

სოციალური ქსელები

CENTCOM: აშშ-ის საზღვაო ძალებმა ბლოკადის დაწყებიდან, ირანთან დაკავშირებული 108 გემი ჩაკეტეს

გუტერეში: მსოფლიოში დაახლოებით 800 მილიონი ადამიანი კვლავ უკიდურეს სიღარიბეში ცხოვრობს

რუსეთი სომხეთს ევროკავშირთან დაახლოების გამო ნავთობისა და გაზის მიწოდების შეწყვეტით დაემუქრა

უკრაინამ ტაგანროგში საავიაციო ქარხანა, ვორონეჟში სამხედრო აეროდრომი და ტუაფსეში ნავთობგადამამუშავებელი ქარხანა დაბომბა