2019-03-12 11:28:39, 1584 ნახვა

---

შსს - „საქართველოს ბანკზე“ თავდასხმაში ბრალდებულებმა კვალის დაფარვის მიზნით, გატაცებული ავტომობილი დაწვეს

გლდანში, „საქართველოს ბანკის“ ფილიალზე თავდასხმაში ბრალდებული, გატაცებული ავტომობილი კვალის დაფარვის მიზნით დაწვეს, - ამის შესახებ შინაგან საქმეთა სამინისტროში გამართულ ბრიფინგზე ცენტრალური კრიმინალური პოლიციის დეპარტამენტის დირექტორის მოადგილე მამუკა ჭელიძემ განაცხადა.

როგორც მან აღნიშნა, პოლიციამ, ჩატარებული საგამოძიებო მოქმედებების შედეგად, გატაცებული ავტომანქანა ნივთმტკიცებად ამოიღო.

„ბრალდებულებმა, ბანკის ფილიალზე ყაჩაღურ თავდასხმამდე, თავისუფლება უკანონოდ აღუკვეთეს 2 მოქალაქეს და კუთვნილი ავტომანქანა ჩამოართვეს. პოლიციის ოპერატიული რეაგირების შედეგად, თავდამსხმელები იძულებული გახდნენ მძევლად აყვანილი ორივე მოქალაქე გაეთავისუფლებინათ და შემთხვევის ადგილიდან გატაცებული ავტომანქანით მიიმალნენ. დანიშნულია ყველა შესაბამისი ექსპერტიზა და გრძელდება საგამოძიებო მოქმედებები“, - განაცხადა ჭელიძემ.

მისივე თქმით, დანაშაულში მონაწილე მესამე პირის ვინაობა დადგენილია და მისი დაკავების მიზნით ინტენსიური ოპერატიულ-სამძებრო ღონისძიებები მიმდინარეობს.

შეგახსენებთ, 8 მარტს, გლდანში მდებარე „საქართველოს ბანკზე“ ყაჩაღური თავდასხმა მოხდა. შეიარაღებული და ნიღბიანი ბრალდებულები ბანკში შეიჭრნენ და სიცოცხლის მოსპობის მუქარით ფული მოითხოვეს. ბანკის თანამშრომლებმა განგაშის სიგნალით დაცვის პოლიცია გამოიძახეს. ბანკის ფილიალთან მისულ დაცვის პოლიციას თავდამსხმელებმა ცეცხლი გაუხსნეს. სროლისას არავინ დაშავებულა.

ყაჩაღობის, პოლიციელზე თავდასხმის, ცეცხლსასროლი იარაღის მართლსაწინააღმდეგო შეძენა-შენახვა-ტარებისა და თავისუფლების უკანონო აღკვეთის ბრალდებით დაკავებულია 2 პირი - წარსულში ნასამართლევი და ამჟამად პირობითი მსჯავრის ქვეშ მყოფი, 1998 წელს დაბადებული ნ.ქ. და ასევე, წარსულში ნასამართლევი, 1999 წელს დაბადებული კ.გ. დანაშაული 7-დან 10 წლამდე თავისუფლების აღკვეთას ითვალისწინებს.

---

ავტორი: ,

---

დღის თემა

მთავარი თემა

ინტერვიუ - ექსკლუზივი