კახიძე - შს მინისტრთან კითხვები გამოუძიებელ საქმეებზე, გაზრდილ კრიმინალსა და 12 მაისის სპეცოპერაციაზე გვექნება

2018-05-18 14:14:38, 1603 ნახვა

სამართალი

გამოუძიებელ საქმეებზე, გაზრდილ კრიმინალსა და 12 მაისის სპეცოპერაციის მიზანშეწონილობაზე გავამახვილებთ ყურადღებას, - ამის შესახებ „ევროპული საქართველოს“ წევრმა ოთარ კახიძემ შს მინისტრის პარლამენტში მისვლასთან დაკავშირებით განაცხადა.

როგორც კახიძემ აღნიშნა, ოპოზიციას აინტერესებს, რა ქმედით ღონისძიებებს ატარებს შინაგან საქმეთა სამინისტრო ქვეყანაში არსებული ვითარების გასაუმჯობესებლად.

,,ჩვენ გვაქვს დანაშაულის უპრეცენდენტო ზრდა, რაც ძალიან აწუხებს ჩვენს საზოგადოებას. გვაინტერესებს თუ რა ქმედით ღონისძიებას ატარებს სამინისტრო ამ ვითარების შესაცვლელად, ვინაიდან სისხლის სამართლის პოლიტიკის ცვლილებას ჩვენ ვერ ვხედავთ. ამავე დროს მრავლად არის გამოუძიებელი საქმეები, რომელიც დაგროვილია სამინისტროში. პრობლემაა პოლიციელთა მხრიდან უფლებამოსილების გადამეტების და ამ საკითხებზე რეაგირების შემთხვევები.

აუცილებლად შევეხებით 12 მაისის სპეცოპერაციას, რამდენად მიზანშეწონილი იყო სპეცრაზმის გამოყენება და კლუბებში შეჭრა მაშინ, როდესაც დაკავებულები იყვნენ უკვე ნარკორეალიზატორები და რა კავშირი აქვს ხელისუფლებას მოძალადე ფაშისტურ ჯგუფთან, რომლის გამოყენებითაც დააშანტაჟეს კანონიერი კონსტიტუციური აქციის მონაწილეები“, - განაცხადა ოთარ კახიძემ.

ცნობისთვის, დღეს პარლამენტის პლენარულ სხდომაზე, შინაგან საქმეთა მინისტრს, გიორგი გახარიას მოუსმენენ.

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები