კარლეს პუჩდემონი თანამდებობაზე დაბრუნებისთვის აღარ იბრძოლებს

2018-03-02 11:07:49, 2147 ნახვა

მსოფლიო

კატალონიის ყოფილი ლიდერი კარლეს პუჩდემონი თანამდებობაზე დაბრუნებისთვის აღარ იბრძოლებს. ამის შესახებ მან ვიდეომიმართვაში განაცხადა, რომელიც სოციალურ ქსელში გამოქვეყნდა.

პუჩდემონი თავის კანდიდატურას დაპატიმრებული პოლიტიკოსის, ჟორდი სანჩესის სასარგებლოდ ხსნის.

„ჟორდი ჩემზე მეტად წარმოადგენს კოალიციის ღირებულებებს. ის მშვიდობიანი ადამიანია და უსამართლო პატიმრობაშია“, - ამბობს პუჩდემონი ვიდეომიმართვაში.

პუჩდემონის თქმით, ის უახლოეს დღეებში “საზეიმო შეკრებაზე“ თავს მოუყრის კატალონიის პარლამენტის წევრებს, „რათა ახალი ეტაპი დაიწყოს და ჩამოაყალიბებს რესპუბლიკის საბჭოს, რომელიც ქვეყანას რეალურ დამოუკიდებლობამდე მიიყვანს“.

ჟორდი სანჩესი ორგანიზაცია „კატალონიის ეროვნული ასამბლეის“ყოფილი ხელმძღვანელია. ის პუიჩდემონის კოალიციის სიის მეორე ნომერი იყო გასული წლის 21 დეკემბრის არჩევნებზე.

ესპანეთის მთავრობა მას აჯანყების ორგანიზებაში, სახელმწიფო სახსრების უკანონო მითვისებასა და გაფლანგვაში ადანაშაულებს.