ქართულ საფეიქრო ინდუსტრიას ახალი  საწარმო  შეემატა. 

ეკონომიკის სამინისტროს ინფორმაციით, თანამედროვე სტანდარტების ფაბრიკა დღეს ეკონომიკისა და მდგრადი განვითარების მინისტრმა გიორგი გახარიამ გახსნა. 

მინისტრის განცხადებით, მსუბუქი მრეწველობის დარგი საქარველოში სულ უფრო ვითარდება და რაც, მთავარია დამატებითი სამუშაო ადგილები იქმნება.

,,პირველ რიგში, მინდა მადლობა გადავუხადო ევროპის რეკონსტრუქციისა და განვითარების ბანკს, რომელმაც ძალიან აქტიური მონაწილეობა მიიღო საწარმოების განახლებაში. პრინციპულად მნიშვნელოვანია, რომ აქ არის წარმოდგენილი წარმოების სრული ციკლი - იდეიდან, მოდელირებიდან  საბოლოო პროდუქტამდე. საკმაოდ დივერსიფიცირებული ბიზნესი აქვთ. სიმართლე გითხრათ, ძალიან მომეწონა. მათ ეფექტურად აქვთ აწყობილი ბაზრებზე წვდომის არხებიც. ამ კომპანიისთვის ექსპორტზე წვდომა პრობლემას არ წარმოადგენს. ბრენდულ მაღაზიებს ხსნიან და ა.შ.“ - განაცხადა გიორგი გახარიამ.
მინისტრის თქმით, მსუბუქი მრეწველობა ის სექტორია, სადაც საქართველოს სერიოზული ზრდის პოტენციალი გააჩნია. 

,,ეს არის წარმატებული ბიზნესის აწყობის სრული ციკლის ძალიან კარგი მაგალითი. ჩვენი მხრიდან სახელმწიფო პროგრამის ,,აწარმოე საქართველოში“ ინსტრუმენტებით დავეხმარებით მსგავს წარმოებებს და ამ კონკრეტულ წარმოებას. ვთვლი, რომ მსუბუქი მრეწველობა ის სექტორია, სადაც ჩვენ სერიოზული ზრდის პოტენციალი გაგვაჩნია. განსაკუთრებით მნიშვნელოვანია ეს ჩვენთვის, რადგან მსუბუქი მრეწველობა ის დარგია, სადაც დამატებითი სამუშაო ადგილების შექმნა საკმაოდ ეფექტიანად და სწრაფად შეიძლება‘’- განაცხადა გიორგი გახარიამ.

ცნობისთვის, კომპანია ,,მატერია“ ქართველი დიზაინერების პროდუქციას აერთიანებს და ორ ბრენდს, პრემიუმ კლასის „მატერიელი“ და საშუალო შემოსავლიან სეგმენტზე გათვლილი „დოთსი“ ფლობს. 
,,მატერიელის“  ბრენდი ექსპორტზე ათამდე ქვეყანაში გადის (შვეიცარია, ავსტრალია, სამხრეთ კორეა, რუსეთი,  იტალია, ჩინეთი, სასომხეთი, ყატარი, ქუვეითი, უკრაინა). 

კომპანიამ  EBRD-სგან   1 200 000 ლარის ოდენობის ბიზნესსესხი აიღო, რაც თანამედროვე ტექნოლოგიის საწარმოო ხაზის შეძენას მოხმარდა. კომპანიის მაღაზიები თბილისში, კოტე აფხაზის ქუჩაზე და ბათუმში სასტუმრო ,,ჰილტონში“ მდებარეობს. უახლოეს დღეებში კომპანიის პირველი მაღაზია შეერთებულ შტატებში, ნიუ-იორკში გაიხსნება. 

„მატერია“უნიფორმებს ქართული ჯარისთვის, საპატრულო და სასაზღვრო პოლიციისთვის, მერიის დასუფთავების სამსახურისთვის, „საქართველოს ფოსტისთვის,“ საქართველოს რაგბის ეროვნული ნაკრებისთვის კერავს. 

 „მატერიას“ წარმომადგენლების ინფორმაციით, სამომავლოდ ფეხსაცმლის ხაზის შექმნაც იგეგმება. ჰოლდინგის მიერ ნაწარმოები მასიური პროდუქცია ექსპორტზე კიდევ უფრო მეტ ქვეყანაში გავა. 

კომპანია „მატერიამ“ თბილისში ევროპული სტანდარტების თანამედროვე ფაბრიკა ააშენა, სადაც ამ ეტაპზე 250-მდე ადამიანია დასაქმებული  და მომავალში ეს ციფრი საგრძნობლად გაიზრდება.

(NS) 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

სოფელ წინაკვერკვეში მეწყრული პროცესები ვითარდება

ზელენსკი: მივიღეთ ცნობები, რომ რუსეთი ჩვენ წინააღმდეგ ორეშნიკის გამოყენებისთვის ემზადება

ჩეხეთის პრეზიდენტმა რუსეთს ინტერნეტთან კავშირის გათიშვა შესთავაზა.

დიუშენის კუნთოვანი დისტროფიის მქონე ბავშვების დასახმარებლად უკვე 1 300 000 ლარი შეგროვდა - მარათონი გრძელდება