ბათუმში ფორუმი „ციტრუსის ექსპორტი 2016“ გაიხსნა

2016-10-31 18:24:00, 725 ნახვა

პოლიტიკა

ქობულეთში, სასტუმრო ,,ჯორჯიან პალასში", საერთაშორისო ფორუმი ,,ციტრუსის ექსპორტი 2016" გაიხსნა. ფორუმი მისასალმებელი სიტყვით აჭარის ავტონომიური რესპუბლიკის მთავრობის თავჯდომარემ ზურაბ პატარაძემ გახსნა.

,,ჩემთვის სასიხარულოა, რომ დღეს ამ ფორმატში შევიკრიბეთ და გვაქვს საშუალება ვიმსჯელოთ აჭარაში ციტრუსის სეზონის შეუფერხებელი მენეჯმენტის საკითხებზე, არსებულ გამოწვევებსა და სეზონის მოსალოდნელ პროგნოზებზე.

მას შემდეგ რაც საქართველომ ხელი მოაწერა ევროკავშირთან ასოცირების შესახებ შეთანხმებას, მნიშვნელოვნად გაიზარდა ევროპულ ბაზარზე ქართული პროდუქციის ექსპორტის შესაძლებლობები. თუმცა, ქართულმა პროდუქციამ ევროპელ მომხმარებლებამდე რომ მიაღწიოს, მნიშვნელოვანია მისი ხარისხი ევროპულ სტანდარტებს პასუხობდეს. აქედან გამომდინარე, ქართველ მწარმოებლებს უკვე უწევთ ევროკავშირის სტანდარტებზე გადართვა. აღნიშნული ცვლილებების განხორცილება ეტაპობრივად არის შესაძლებელი და საბოლოოდ ქართული კომპანიები მიიღებენ მარტივ წვდომას ევროკავშირის ბაზარზე და გაიზრდება მათი კონკურენტუნარიანობა გლობალურ დონეზე.

დარწმუნებული ვარ დღევანდელი ფორუმი იქნება ნაყოფიერი და ჩვენი სტუმრები გაეცნობიან იმ ჯაჭვს, რომელსაც გადის ჩვენი ციტრუსი დაწყებული მისი შეგროვებიდან დამთავრებული მისი რეალიზაციით"-აღნიშნა ზურაბ პატარაძემ.

ღონისძიებაზე მოწვეულ სტუმრებს სიტყვით მიმართეს საქართველოს სოფლის მეურნეობის მინისტრმა ლევან დავითაშვილმა და აჭარის ავტონომიური რესპუბლიკის სოფლის მეურნეობის მინისტრმა - ლაშა კომახიძემ. ფორუმში მონაწილეობას იღებენ მსხვილი ციტრუსის ექსპორტით დაინტერესებული პირები. საერთაშორისო ფორუმში 8 ქვეყანის 19 ექსპორტიორი, სულ 26 წარმომადგენელი მონაწილეობს: პოლონეთიდან, ლატვიიდან, ლიტვადან, რუსეთიდან, ბელარუსიიდან, ყაზახეთიდან, უზბეკეთიდან და ისრაელიდან.

აჭარის ავტონომიური რესპუბლიკის სოფლის მეურნეობის მინისტრმა ლაშა კომახიძემ ციტრუსის სეზონის მოკლე ანალიზი გააკეთა. სურსათის ეროვნულმა სააგენტომ დამსწრე საზოგადოებას ფიტოსანიტარიული სერტიფიკატის გაცემის პროცედურების განხორციელების შესახებ მიაწოდა ინფორმაცია. სხვადასხვა უწყებების წარმოამდგენლებმა ფორუმში მონაწილეებს ციტრუსის ექსპორტის საბაჟო პროცედურების, უსაფრთხო გადაადგილების უზრუნველყოფის, სახმელეთო და საზღვაო გადაზიდვების და პოტენციური ბაზრების წარმომადგენლების შესახებ მიაწოდეს ინფორმაცია.

ფორუმის დასარულს გაიმართა დისკუსია კითხვა-პასუხის რეჟიმში.

დღის ბოლოს, გაიმართება შემაჯამებელი დისკუსია, წარმატებული - „ნარინჯისფერი რთველის" უზრუნველყოფისათვის საჭირო ღონისძიებებთან დაკავშირებით.

ფორუმის გახსნამდე სტუმრებმა აჭარის სოფლის მეურნეობის მინისტრთან ერთად ციტრუსის შემფუთავ-დამახარისხებელი საწარმოები მოინახულეს. რეგიონში მსგავსი სამი საწარმო მოქმედებს. ლაშა კომახიძის თქმით, მიმდინარე მანდარინის სეზონზე რეგიონი 60 ათას ტონა ციტრუსის მოსავალს ელოდება.

საერთაშორისო ფორმუმი „ციტრუსის ექსპორტი 2016" 1 ოქტომბერს დაიხურება. ფორუმი - არის აჭარის ავტონომიური რესპუბლიკის სოფლის მეურნეობის მინისტრის ინიციატივა და იგი ყოველწლიურ, პერმანენტულ ხასიათს მიიღებს.