წულუკიანი გვარამიაზე: თუკი ჩემი იუსტიციის მინისტრობით არის უბედური, ეს მხოლოდ გამიხარდება

2016-06-09 22:11:58, 482 ნახვა

პოლიტიკა

"თუკი ჩემი იუსტიციის მინისტრობით არის უბედური, ეს მხოლოდ გამიხარდება" - ამის შესახებ საქართველოს იუსტიციის მინისტრმა თეა წულუკიანმა "რუსთავი 2"-ის გენერალური დირექტორის ნიკა გვარამიას მისამართით ტელეკომპანია "იმედის" ეთერში განაცხადა.

წულუკიანის თქმით, ის ნიკა გვარამიას "სერიოზულ პერსონაჟად" არ აღიქვამს, მისივე განცხადებით, "ქართული ოცნება" სამაგალითოდ გამჭვირვალე არჩევნებს ჩაატარებს, რომელშიც "ნიკა გვარამიას პარტიას" და „ნაციონალური მოძრაობის“ ტელევიზიასაც ექნებათ საშუალება, მიიღონ მონაწილეობა.

"ნიკა გვარამიას არ მივიჩნევ სერიოზულ პერსონაჟად, მაგრამ თუკი ჩემი იუსტიციის მინისტრობით არის უბედური, ეს მე მხოლოდ გამიხარდება. ჩვენ ოთხი წლის განმავლობაში შევქმენით 180-ზე მეტი კანონი და რეალურად კანონის ძალით ვაშენეთ ის პროგრესული პროცესი, რომელიც გაგრძელდება, რაც გვარამიას გუნდის 9 წლის მმართველობის შემთხვევაში ვერ გახდა შესაძლებელი. ეს არ არის 90-იანი წლების ხელისუფლება, ჩვენ ვართ ის ხელისუფლება, რომელიც უზრუნველყოფს, მათ შორის, კანონებით პოლიტიკურ სტაბილურობას ამ ქვეყანაში. ეს ხელისუფლება, ეს მთავრობა, რაც არ უნდა იყოს მათი დიდი სურვილი, არ ჩამოიშლება. უფრო მეტიც, ჩვენ ჩავატარებთ სამაგალითოდ გამჭვირვალე არჩევნებს, რომელშიც ნიკა გვარამიას პარტიას და „ნაციონალური მოძრაობის“ ტელევიზიასაც ექნებათ საშუალება, მიიღონ მონაწილეობა და ხალხი გადაწყვეტს, ვინ უნდა დარჩეს ან არ დარჩეს ხელისუფლებაში”, - განაცხადა თეა წულუკიანმა.