ტელეკომპანია „ტაბულას“ დირექტორი თამარ ჩერგოლეიშვილი გადაცემაში მონაწილეობასთან დაკავშირებით, ყოფილი პრემიერ-მინისტრის ბიძინა ივანიშვილის შეთავაზებას პასუხობს.

ჩერგოლეიშვილი შეთავაზებაზე „რუსთავი 2“-ის გადაწყვეტილებას ელოდება. მისივე განცხადებით, მოლაპარაკება ამის შემდეგ გაგრძელდება.

„ცხადია, რუსთავის სახელით მე ვერ ვისაუბრებ - ჩემი და ტაბულას სახელით კი შემიძლია გითხრათ, რომ მე მზად ვარ დავჯდე იქ, სადაც თავს კომფორტულად იგრძნობს რესპონდენტი, შევათანხმო საკითხები წინასწარ (მათ შორის ისინიც, სადაც ივანიშვილს მის მიმართ ცილისწამებისა და სიცრუის ტირაჟირების მხილება სურს) და ვესაუბრო მათ გარშემო. პირდაპირი ეთერი ცხადია პრობლემა არ არის - პირიქით, უკეთესია.

თუ მხოლოდ ჩემთვის არ სურს პასუხების გაცემა, შემიძლია თანაწამყვანთან ერთად დავჯდე - მოკლედ, თქვენ გადაწყვიტეთ. მე პრობლემას ვერ ვხედავ“, - წერს ჩერგოლეიშვილი Facebook საკუთარ გვერდზე.

ცნობისთვის, ყოფილი პრემიერ-მინისტრი ბიძინა ივანიშვილი ტელეკომპანიებს „რუსთავი 2“-ს და „ტაბულას“ პირდაპირ ეთერში მონაწილეობას კონკრეტული პირობებით სთავაზობს.

ექს-პრემიერის შეთავაზებას „რუსთავი 2“-ის გენერალური დირექტორი ნიკა გვარამია ავრცელებს.

ივანიშვილი ტელეკომპანიებს პირდაპირი ეთერის თარიღად 8 ივნისს სთავაზობს. შეთავაზებაში ასევე ნათქვამია, რომ ბიძინა ივანიშვილისა და გადაცემის მოდერატორის გარდა, ეთერში მონაწილეობა თითო არხიდან ორმა ან სამმა ჟურნალისტმა უნდა მიიღოს.

ბიძინა ივანიშვილის შეთავაზება "რუსთავი 2"-ს და "ტაბულას"

„ჟურნალისტები რიგრიგობით სვამენ კითხვებს, რესპოდენტი პასუხობს, კითხვების თანმიმდევრობას და რეგლამენტს უზრუნველყოფს მოდერატორი. თემები: შეხვედრის ერთი ნაწილი დაეთმობა "რუსთავი 2"-ის და "ტაბულას" გადაცემებში საზოგადოებისთვის მიწოდებული იმ ინფორმაციების განხილვას რომლებიც შეეხებოდა ივანიშვილის პერსონას და ხდებოდა სიცრუის ტირაჟირება. მეორე ნაწილი დაეთმობა ივანიშვილის წერილში გაჟღერებული თემების განხილვას. ბოლოს, არხებს ექნებათ საშუალება დასვან სხვა, მათთვის საინტერესო კითხვები“, - ნათქვამია ივანიშვილის შეთავაზებაში, რომელსაც ნიკა გვარამია ავრცელებს.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

კობახიძე: ჩვენთვის კონკრეტულად ბატონი ფიშერი საერთოდ არ არის ევროპელი

კობახიძე: ჩვენ გვინდა სხვანაირი ევროკავშირი

შსს: ჩოხატაურში ერთი პირი დაჭრეს, ის გარდაიცვალა - პოლიციამ 1 პირი დააკავა

Reuters: უკრაინული დრონების დარტყმების შედეგად რუსეთის ცენტრალურ ნაწილში თითქმის ყველა ნავთობგადამამუშავებელმა ქარხანამ მუშაობა შეაჩერა