2016-05-26 13:34:13, 529 ნახვა

---

პრემიერი: დღევანდელი დღე, მიღწევები და პერსპექტივები იმის გარანტიაა, რომ ერთიან და ძლიერ საქართველოში ვიცხოვრებთ

„დღევანდელი მიღწევები და პერსპექტივები იმის გარანტიაა, რომ ვიცხოვრებთ უკეთეს, ერთიან და ძლიერ საქართველოში“, - ამის შესახებ საქართველოს პრემიერ-მინისტრმა გიორგი კვირიკაშვილმა თავისუფლების მოედანზე დამოუკიდებლობის დღესთან დაკავშირებით სიტყვით გამოსვლისას განაცხადა.

პრემიერი დარწმუნებულია,  საქართველო   წარმატებას მიაღწევას აფხაზ და ოს ძმებებთან ერთად   და შეძლებს ტკივილის დაძლევას უკეთესი მომავლისკენ.

„წელს ჩვენი ქვეყანა თავისი დამოუკიდებლობის აღდგენის 25 წლისთავს ზეიმობს. ვულოცავ ამ დღეს მთელს საქართველოს, ყველა ჩვენს თანამემამულეს. დღევანდელ დღეს ვულოცავ ჩვენს საერთაშორისო პარტნიორებს, მათ, ვისაც უდიდესი წვლილი მიგიძღვით ჩვენი ქვეყნის დამოუკიდებლობის განმტკიცებაში. განსაკუთრებით გილოცავთ თქვენ - საქართველოს ჯარისკაცებო. დღევანდელი დღე გამორჩეულად ამაღელვებელია წვევამდელებისათვის. დღეს თქვენ დადეთ ფიცი სამშობლოს წინაშე და გახდით ჩვენი ქვეყნის ჯარისკაცები. მე მჯერა, რომ თქვენ პირნათლად მოიხდით ვალს სამშობლოს წინაშე და არასოდეს დაივიწყებთ, რის ფასად მოიპოვა ჩვენმა ქვეყანამ ეს დამოუკიდებლობა, არასოდეს დაივიწყებთ მათ, ვინც სიცოცხლე შესწირა ჩვენი სამშობლოს დამოუკიდებლობას“,-განაცხადა პრემიერმა.

პრემიერმა საქართველოს დამოუკიდებლობის დღე მიულოცა ჯარისკაცებს, განსაკუთრებით საერთაშორისო მისიის  მონაწილე სამხედროებს, რომლებიც ქვეყანას იცავენ.

ამასთან, პრემიერმა მადლობა ჯარისკაცებს მადლობა   გადაუხადა  ქვეყნის ერთგულებისთვის.

„ საქართველოს სამსახური ყველაზე დიდი პატივია. დარწმუნებული ვარ, თითოეული თქვენგანი ჩვენი ქვეყნის ერთგული ჯარისკაცი იქნება და ყოველთვის გემახსოვრებათ, რომ თქვენს ზურგს უკან, ჩვენი სამშობლო, ჩვენი საქართველოა. დამოუკიდებლობის დღეს ვულცავ საქართველოს შეიარაღებულ ძალებს, ჩვენი ქვეყნის ერთგულ ჯარისკაცებს, განსაკუთრებით, საერთაშორისო მისიის მონაწილე სამხედროებს, რომლებიც საქართველოს სახელმწიფო იცავენ, იცავენ მშვიდობას მსოფლიოში.

მადლობა მათ ქვეყნის ერთგულებისთვის და მსოფლიოში ქართველი ჯარისკაცების უშიშარ და თავდადებულ მეომრებად წარმოჩენისთვის.

ამ 25 წლის განმავლობაში საქართველომ რთული გზა განვლო. დიდი მსხვერპლი გაიღო. პატივს მივაგებთ სამშობლოსთვის დაღუპული გმირების ხსოვნას. მეგობრებო, ჩვენს სამშობლოს ბევრი ტკივილი და გამარჯვება უნახავს, მაგრამ დღევანდელი დღე, დღევანდელი მიღწევები და პერსპექტივები იმის გარანტიაა, რომ ვიცხოვრებთ უკეთეს, ერთიან და ძლიერ საქართველოში. ჩვენს ქვეყანას წინ აქვს დიდი წარმატებები და გამარჯვებები თითოეული ჩვენი მოქალაქის საკეთილდღეოდ. დარწმუნებული ვარ, ამ წარმატებებს ჩვენს აფხაზ და ოს ძმებთან ერთად მივაღწევთ, შევძლებთ ტკივილის დაძლევას და უკეთესი მომავლისკენ ერთად განვაგრძობთ გზას. მეგობრებო, სამშობლოს ჯარისკაცებო, კიდევ ერთხელ გილოცავთ დღევანდელ დღეს და გისურვებთ მშიდობას. ღმერთი იყოს თქვენი და მთელი საქართველოს მფარველი“, - განაცხადა კვირიკაშვილმა.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი