საქალაქო სასამართლოსთან აქციაზე სიტყვიერი დაპირისპირება მოხდა

2016-04-26 16:05:42, 892 ნახვა

სამართალი

თბილისის საქალაქო სასამართლოსთან “ბუტა რობაქიძის და მიხეილ სააკაშვილის რეჟიმის სხვა მსხვერპლთა” სოლიდარობის აქცია მიმდინარეობს.

ცოტა ხნის წინ, აქციაზე შსს ცენტრალური კრიმინალური პოლიციის დეპარტამენტის სამძებრო სამმართველოს უფროსის ყოფილი მოადგილის გიორგი ცააძის დას, ირინა ცააძესა და „დემოკრატიის ინსტიტუტის“ ხელმძღვანელ ლაშა ჩხარტიშვილს შორის სიტყვიერი დაპირისპირება მოხდა.

ლაშა ჩხარტიშვილის თქმით, წინა ხელისუფლების დროს, უდანაშაულო ადამიანებს კლავდნენ და სასტიკად უსწორდებოდნენ. ირინა ცააძის მტკიცებით კი, ზურაბ ვაზაგაშვილი, რომელიც ე.წ. კორტებთან ჩატარებულ სპეცოპერაციას შეეწირა, დამნაშავე იყო.

აქტივისტები მიხეილ სააკაშვილის ხელისუფლების პირობებში მომხდარი გახმაურებული დანაშაულების გამოძიებას, ასევე მსხვერპლთა ოჯახის წევრების შეურაცხყოფის შეწყვეტას ითხოვენ.

აქციაზე ბუტა რობაქიძის ოჯახის წევრებიც იმყოფებიან. ადგილზე მობილიზებულია პოლიცია.

შეგახსენებთ, 2006 წლის 2 მაისს ე.წ „კორტების სპეცოპერაციისას„ მოკლული ზურაბ ვაზაგაშვილისა და ალექსანდრე ხუბულოვის საქმეზე ბრალდებული შსს ცენტრალური კრიმინალური პოლიციის დეპარტამენტის სამძებრო სამმართველოს უფროსის ყოფილი მოადგილე გიორგი ცააძე სასამართლომ დამნაშავედ ცნო.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან