საგარეო საქმეთა მინისტრი, მიხეილ ჯანელიძე საქართველოში ვიზიტით მყოფ გაეროს გენერალური მდივნის მოადგილეს პოლიტიკურ საკითხებში, ჯეფრი ფელტმანს შეხვდა.

საგარეო უწყების ინფორმაციით, შეხვედრაზე მხარეებმა გაეროსა და საქართველოს თანამშრომლობის აქტუალური საკითხები, ასევე მსოფლიოში მიმდინარე პროცესები განიხილეს. აღნიშნეს,  მსოფლიოში არსებული გამოწვევების  აღმოფხვრის პროცესში  გაეროს ჩართულობისა და გაეროს ქარტიის ძირითადი პრინციპების საფუძველზე სახელმწიფოთა შორის თანამშრომლობის მნიშვნელობა.  

შეხვედრაზე განსაკუთრებული ყურადღება დაუთმეს საქართველოსა და  რეგიონში უსაფრთხოების კუთხით არსებულ ვითარებას.  საგარეო საქმეთა მინისტრმა გაეროს გენერალური მდივნის მოადგილეს მიაწოდა  ინფორმაცია საქართველოს ოკუპირებულ რეგიონებში  არსებული მდგომარეობის შესახებ. ქართულმა მხარემ ყურადღება გაამახვილა აფხაზეთისა და ცხინვალის ოკუპირებულ რეგიონებში მიმდინარე მილიტარიზაციის პროცესსა და   ადამიანის უფლებების  დარღვევის ფაქტებზე. 

ქართულმა მხარემ შეშფოთება გამოთქვა რუსეთის მიერ საქართველოს წინააღმდეგ მიმართული ანექსიის პოლიტიკის გამო, რისი ნათელი მაგალითია სოხუმისა და ცხინვალის საოკუპაციო რეჟიმებთან ინტეგრაციის შესახებ ე.წ. ხელშეკრულებების გაფორმება და ცხინვალის საოკუპაციო რეჟიმის ბოლოდროინდელი განცხადებები რეფერენდუმის ჩატარებასთან დაკავშირებით. აღნიშნეს, რომ რუსეთის ფედერაციის უკანონო ქმედებები საფრთხეს უქმნის საქართველოსა და მთელი რეგიონის უსაფრთხოებას და უგულებელყოფს გაეროს ქარტიით გათვალისწინებულ ფუნდამენტური პრინციპებსა და მოსკოვის მიერ ნაკისრ საერთაშორისო ვალდებულებებს, უპირველესად, 2008 წლის 12 აგვისტოს ცეცხლის შეწყვეტის შეთანხმების პირობებს.

საგარეო საქმეთა მინისტრმა აღნიშნა ჟენევის საერთაშორისო მოლაპარაკებების  მნიშვნელობა და ამასთან დაკავშირებით  მადლობა გადაუხადა გაეროს გენერალური მდივნის მოადგილეს თანათავმჯდომარის საქმიანობისთვის. მინისტრმა ხაზი გაუსვა თანათავმჯდომარეების როლს დღის წესრიგით გათვალისწინებული ისეთი ძირითადი საკითხების შესრულების პროცესში, როგორებიცაა: ძალის გამოუყენებლობა, უსაფრთხოების საერთაშორისო მექანიზმების შექმნა და დევნილი მოსახლეობის უსაფრთხო და ღირსეული დაბრუნება.

შეხვედრაზე  დადებითად შეაფასეს  გალის ინციდენტებისა და რეაგირების მექანიზმის აღდგენის თაობაზე შეთანხმების  მიღწევა და გამოთქვეს იმედი, რომ მექანიზმი შეუფერხებლად გააგრძელებს მუშაობას  სტაბილურობისა და ადგილობრივი მოსახლეობის საჭიროებების უზრუნველსაყოფად.

თავის მხრივ, გენერალური მდივნის მოადგილემ საქართველოს სუვერენიტეტისა და ტერიტორიული მთლიანობის მიმართ გაეროს ურყევი პოზიცია დაადასტურა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

კანის კინოფესტივალის გრან-პრის მფლობელმა რეჟისორმა ზვიაგინცევმა პუტინს უკრაინაში ომის დასრულებისკენ მოუწოდა.

ევროპული კინოს ტრიუმფი კრუაზეტზე: კანის 2026 წლის ფესტივალის შედეგები

ზელენსკიმ კიევში დარტყმის ადგილები მოინახულა

მეუფე დანიელი - ჩვენი დიდი სურვილია, რომ ქვეყანაში დასრულდეს ურთიერთდაპირისპირება