საქართველოს ტერიტორიული მთლიანობისთვის ბრძოლაში დაღუპული მებრძოლები დიღმის ძმათა სასაფლაოზე  სამხედრო პატივით დაკრძალეს.

სამგლოვიარო ცერემონიას დევნილთა და განსახლების მინისტრი სოზარ სუბარი, თავდაცვის მინისტრის მოადგილე დავით ებრალიძე და  დედაქალაქის მერი დავით ნარმანია დაესწრნენ.

სოზარ სუბარის განცხადებით, სიმბოლურია, რომ 12 გმირის დაკრძალვა, სწორედ 9 აპრილს დაემთხვა.

„ერთ-ერთი ყველაზე ტრაგიკული და ყველაზე ჰეროიკული დღეა  9 აპრილი. ალბათ სიმბოლურია, რომ  12 გმირის დაკრძალვა სწორედ ამ დღეს დაემთხვა . 9 მათგანი ძმათა სასაფლაოზე დაკრძალეს, ხოლო  3 საგვარეულო სასაფლაოებზე გადაასვენეს.  უკვე 43 ადამიანის  იდენტიფიცირება მოხდა.  კიდევ 208 ნეშტი არის  გადმოსვენებული,  რომელთა იდენტიფიცირების პროცესი მიმდინარეობს. ამ პროცესში მონაწილეობს ძალიან ბევრი ადამიანი. განსაკუთრებული მადლობა მინდა ვუთხრა საერთაშორისო წითელ ჯვარს იმ უზარმაზარი ძალისხმევისთვის,  რასაც ისინი იჩენენ.  ასევე განსაკუთრებული მადლობა აფხაზურ მხარეს,  იმიტომ რომ საოცარი გულისხმიერებით უდგებიან ამ საკითხს.  მათ აბსოლუტურად გასიგრძეგანებული აქვთ,  რომ ეს არის ჰუმანიტარული მისია  და აქ პოლიტიკაზე ლაპარაკი იქნებოდა ზედმეტი“ , - განაცხადა სოზარ სუბარმა.

ბაბუშერას ტრაგედიის დროს დაღუპულთა სამოქალაქო პანაშვიდი სამების საკათედრო ტაძარში ორი დღის განმავლობაში მიმდინარეობდა. დღეს, საქართველოს პრეზიდენტმა გიორგი მარგველაშვილმა, დევნილთა და განსახლების მინისტრმა სოზარ სუბარმა და საქართველოს მთავრობის სხვა წევრებმა სამების საკათედრო ტაძარში კიდევ ერთხელ მიაგეს პატივი დაღუპული მებრძოლების ხსოვნას და გარდაცვლილთა ოჯახის წევრებს მიუსამძიმრეს.

2010 წელს წითელი ჯვრის ეგიდით შეიქმნა ორმხრივი საკოორდინაციო ჯგუფი, რომელიც 1992-1993 წლებში ქართულ-აფხაზური კონფლიქტის შედეგად უგზო-უკვლოდ დაკარგულთა მოძიების საკითხებს შეისწავლის.

მოლაპარაკების შედეგად გადაწყდა ბაბუშერას ძმათა სასაფლაოს გახსნა და ცხედრების ექსჰუმაცია.

ბაბუშერას ძმათა სასაფლაოზე სამარხის გახსნის შემდეგ, იდენტიფიცირების მიზნით, ნეშტები გადმოსვენებულ იქნა ლევან სამხარაულის სახელობის სასამართლო ექსპერტიზის ეროვნულ ბიუროში. საქართველოში ჩატარებული გენეტიკური პროფილები ხორვატიაში, ზაგრების უნივერსიტეტის დნმ ლაბორატორიაში გაიგზავნა. ამ ეტაპზე, ბაბუშერას სამარხიდან გადმოსვენებული 43-ვე ნეშტი უკვე იდენტიფიცირებულია.

დევნილთა და განსახლების სამინისტროსა და აფხაზეთის დე ფაქტო მთავრობის წარმომადგენლებს შორის მიმდინარე მოლაპარაკებების შედეგად, 2016 წელს კიდევ ორი სამარხი გაიხსნება, საიდანაც 100-ზე მეტ ცხედარს გადმოასვენებენ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

სამთავრობო იმედის სახემ ნანუკა ხაზარაძემ ტელევიზია დატოვა

ცოტნე ივანიშვილი - არსებობს ყალბი სტერეოტიპი, თითქოს ახალგაზრდების უმეტესობა ქართული ოცნების მიმართ რადიკალურად ცუდად არის განწყობილი

დამოუკიდებლობის დღესთან დაკავშირებით 27-28 მაისამდე ქუჩების ნაწილზე მოძრაობა შეიზღუდება

ზელენსკი - პუტინს უკვე სიტყვა „ურა“-ს ნორმალურად წარმოთქმაც კი არ შეუძლია, ლუღლუღებს, მაგრამ თავისი რაკეტებით მაინც საცხოვრებელ სახლებს „ამარცხებს“