2024-12-13 20:06:36, 415 ნახვა

---

პრეზიდენტი - ე.წ. მერი გვიწყობს პროვოკაციას - ღონისძიება სწორედ ხვალ, სწორედ 19:00 საათზე, სწორედ პარლამენტთან, კარგად გვესმის, რას ემსახურება

საქართველოს პრეზიდენტი სალომე ზურაბიშვილი ხვალ, 14 დეკემბერს თბილისში, რუსთაველის გამზირზე დედაქალაქის მთავარი ნაძვის ხის ანთების ღონისძიებას მერის, კახა კალაძის მიერ დაგეგმილ პროვოკაციას უწოდებს.

პრეზიდენტმა ცოტა ხნის წინ გამართულ საგანგებო ბრიფინგზე კალაძეს შესთავაზა, რომ ის, რაც საკანონმდელბო ორგანოს წინ არის დაგეგმილი, ორბელიანების სასახლის წინ გაიმართოს.

„დავიწყებ ხვალინდელი დღით და იმ უაზრო რაღაც პროვოკაციით, რასაც გვიწყობს ქალაქის ე.წ. მერი, რომელმაც დაგეგმა ხვალ, 19:00 საათზე ვითომცდა ნაძვის ხის ანთება ბავშვებთან ერთად. ეს აშკარა პროვოკაცია არის, რამეთუ ორი კვირა არის უკვე, რომ უწყვეტლივ იმ ადგილას, იმ დროს არის გამოხატული პროტესტი და ხვალ რადგან იმართება პარლამენტში პაროდია, იმ დღეს უთუოდ იქნება ასევე ძალიან დიდი პროტესტი. იმ ადგილას მოწყობა ამ ღონისძიების, სწორედ ხვალ, სწორდ 19:00 საათზე, სწორედ პარლამენტის წინ, ყველას ძალიან კარგად გვესმის, ეს რას ნიშნავს, რატომ არის გაკეთებული და რას ემსახურება. იმ ადგილას, სადაც თვით ექიმები ამბობენ, რომ რუსთაველზე შენობების ფასადები უკვე გაზით არის გაჟღენთილი, ხეებიც და ალბათ, სასურველი არ არის იქ ბავშვების მიყვანა. მე მინდა, გავაფრთხილო ქალაქის მერი, რომ ეს მისი პროვოკაცია, ალბათ, არაფერს არ გამოიწვევს იმიტომ, რომ ეს პროტესტი, რაც გაშლილი არის დღეს ქალაქში და ხვალაც იქნება, ზეგაც იქნება და იქნება, არის ძალიან მშვიდობიანი და თვითონ მოახერხებენ, ალბათ, ამ პროვოკაციის თავიდან აცილებას, მე მინდა, მაინც ვუთხრა - თუ ეს პროვოკაცია არ არის, რაღა ხვალ? მოდის ბარბარობა, რომელიც ბევრად უფრო ბუნებრივი არის - გადაიტანოს და მე ვთავაზობ, აქ, ორბელიანების სასახლის წინ, სადაც დააყენა რაღაც ბარაკები და ვითომ ბავშვებისთვის სათამაშოები, აქ მოიყვანოს ბავშვები და ორბელიანების სასახლის წინ მოაწყოს ის ღონისძიება, რასაც გეგმავს პარლამენტის წინ. მაგრამ რაც არ უნდა მოხდეს და თუ რამე მოხდა, პასუხისმგებლობა, ცხადია, მთლიანად და მხოლოდ პირადად მასზე იქნება“,- განაცხადა სალომე ზურაბიშვილმა.

შეგახსენებთ, დედაქალაქის მთავარი ნაძვის ხე თბილისში, რუსთაველის გამზირზე 14 დეკემბერს, 19:00 საათზე აინთება.

პარალელურად კი, რამდენიმე დღეა, ამავე ადგილზე საპროტესტო აქციები იმართება.

თბილისი და საქართველოს სხვა დიდი ქალაქები, მათ შორის, ბათუმი, ზუგდიდი, ქუთაისი, საპროტესტო ტალღამ მას შემდეგ მოიცვა, რაც ქვეყნის პრემიერ-მინისტრმა, ირაკლი კობახიძემ გაახმოვანა მმართველი პარტიის გადაწყვეტილება, რომ ევროკავშირთან მოლაპარაკებების გახსნის საკითხი 2028 წლის ბოლომდე დღის წესრიგში არ დადგება.

28 ნოემბრიდან დღემდე, მთავრობის გადაწყვეტილება არაერთმა პროფესიულმა ჯგუფმა, მათ შორის განათლების, ხელოვნების, IT და ტექნოლოგიური სფეროს წარმომადგენლებმა გააპროტესტეს.

აქციების დაწყებიდან დღემდე, პოლიციამ ასობით ადამიანი დააკავა, მათ შორის როგორც სისხლის სამართლის, ისე ადმინისტრაციულ სამართალდარღვევათა კოდექსის საფუძველზე.

შინაგან საქმეთა სამინისტროს მიერ გავრცელებული ინფორმაციის მიხედვით, რუსთაველის გამზირზე, აქციების მიმდინარეობისას ჯგუფური ძალადობის ორგანიზების, ხელმძღვანელობის ან მასში მონაწილეობის, ძალადობრივი ქმედებისაკენ საჯაროდ მოწოდების, ასევე, აფეთქების მომზადების, პოლიციაზე თავდასხმისა და ნივთის დაზიანების ფაქტებზე, გამოძიება სისხლის სამართლის კოდექსის 225-ე, 239-ე პრიმა, 187-ე, 353-ე პრიმა და 18-229-ე პრიმა მუხლებით მიმდინარეობს.

შსს-ს თანამშრომლების მიერ გამოძიების ფარგლებში ამ დროისთვის დაკავებულია 30-ზე მეტი პირი.

დაშავებულია ათობით ადამიანი, რომლებიც დაკავების შემდგომ სპეცრაზმელებისგან ფიზიკურ ანგარიშსწორებაზე უთითებენ. დაშავებულთა შორის არიან მედიის წარმომადგენლები. ერთ-ერთი ბოლო თავდასხმა მედიაზე 7 დეკემბერს მოხდა, როდესაც „TV პირველის“ ჟურნალისტ მაკა ჩიხლაძესა და ოპერატორ გიორგი შეწირულს თბილისში, ბესიკის ქუჩის მიმდებარედ ფიზიკურად გაუსწორდნენ. 

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი