2024-10-18 17:46:17, 354 ნახვა

---

სააკაშვილი - არჩევნებში გამარჯვების შემდეგ ემიგრანტების დაბრუნების სამინისტროს და ერთმილიარდიან ფონდს შევქმნით

არჩევნებში გამარჯვების შემდეგ, ჩვენ შევქმნით ემიგრანტების დაბრუნების სამინისტროს,- ამის შესახებ ნათქვამია მიმართვაში, რომელსაც საქართველოს მესამე პრეზიდენტი მიხეილ სააკაშვილი ემიგრანტების მიმართ ავრცელებს.

როგორც მიმართვაშია აღნიშნული, ემიგრანტების დაბრუნებაში დასახმარებლად ერთმილიარდიანი ფონდი შეიქმნება.

"მოგესალმებით რუსული გისოსებიდან. მე ყველაზე მეტად ვიცი, თუ რას ნიშნავს სამშობლოს მონატრება. სწორედ სამშობლოს მონატრებამ ჩამომიყვანა სამი წლის წინ საქართველოში. ჩამომიყვანა ასევე საქართველოს გადარჩენის სურვილმა. სწორედ ახლა დადგა კრიტიკული მომენტი, როცა ყველამ ერთად უნდა გადავარჩინოთ საქართველო. აგერ, მთელი მსოფლიოც მოუწოდებდა ქართველ ხალხს, რომ არჩევნებზე არ გაყიდონ მომავალი.

თქვენ იცით, რომ თუ რაღაც მანქანით ივანიშვილი დარჩა, ჩვენ გაგვიუქმებენ უვიზო მიმოსვლას და ჩაგვხსნიან "სვიფტის" გადარიცხვის სისტემიდან, რაც ნიშნავს, რომ თქვენ ვეღარ გადმორიცხავთ ფულს და გაგიჭირდებათ წინ და უკან გადაადგილება. გარდა ამ უშუალო ზიანისა, ჩვენ უბრალოდ დავკარგავთ ჩვენ სამშობლოს!

ვიცი, რომ ბევრი მიდიხართ არჩევნებზე იმ ქვეყნებში, სადაც იმყოფობით. არანაკლებ მნიშვნელოვანია, რომ დაურეკოთ თქვენ ახლობლებს, ვინც საქართველოშია და სთხოვოთ (მოთხოვოთ), რომ არ მისცენ ხმა ქვეყნის გარუსებას და პირიქით მხარი დაუჭირონ პროევროპულ ძალებს, როგორც ამისკენ თავად ევროპა ჩვენივე საკეთილდეოდ ღია ტექსტით გვიბიძგებს.

მინდა ყველას შევახსენო, რომ ვარდების რევოლუციის შემდეგ და 2012 წლის ჩათვლით უფრო მეტი ადამიანი ბრუნდებოდა საქართველოში, ვიდრე ტოვებდა აქაურობას. ამიტომ, ჩემი პარტიის ნომერი, 5 ნომერი არის პირველ რიგში ემიგრანტთა დაბრუნების ნომერი.

ჩვენ არა მხოლოდ შეგვიძლია სიტუაციის სწრაფი შემობრუნება, არამედ შევქმნით ერთმილიარდიან ფონდს ემიგრანტების დაბრუნებაში დასახმარებლად.

არჩევნებში გამარჯვების შემდეგ, ჩვენ შევქმნით ემიგრანტების დაბრუნების სამინისტროს, დავავალებთ ახალი მთავრობის ლიდერებს მოიარონ ემიგრანტთა განსახლების ადგილები და მოელაპარაკონ მათ დაბრუნებისთვის პირობების შექმნაზე.

ჩვენ ვიცით, თუ როგორ უნდა დავაბრუნებთ ქვეყანაში ხალხი და ამას მივაღწევთ. ე.ი. მივაღწევთ ოჯახების გამთლიანებას და საქართველოში დემოგრაფიული კატასტროფის შეჩერებას! ვიმარჯვებთ ერთად და სახელოვნად!“ - ნათქვამია სააკაშვილის მიმართვაში, რომელსაც "ნაციონალური მოძრაობის" პრესსამსახური ავრცელებს.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი