2024-09-02 22:00:17, 421 ნახვა

---

თამარ ტყეშელაშვილი - მოსარჩელე მხარეს სურდა, საკონსტიტუციო სასამართლოს ტრიბუნა პოლიტიკური განცხადებებისთვის გამოეყენებინა

საკონსტიტუციო სასამართლოში მიმდინარე პროცესზე მოსარჩელე მხარის არგუმენტები უფრო მეტად იყო პოლიტიკური. რჩებოდა შთაბეჭრილება, რომ მათ სურდათ აღნიშნული ტრიბუნა პოლიტიკური განცხადებების გაკეთებისთვის გამოეყენებინათ, - ამის შესახებ იუსტიციის მინისტრის პირველმა მოადგილემ, თამარ ტყეშელაშვილმა ტელეკომპანია "იმედის" გადაცემა "დღის ქრონიკაში" ისაუბრა.

"როგორც კი ჩვენ საუბარი სამართლებრივი არგუმენტებით მიგვყავდა, მოსარჩელე მხარე ერთსა და იმავე კითხვას მაინც სხვადასხვა კონტექსტში რამდენჯერმე იმეორებდა. იყო ძალიან დიდი მცდელობა საზოგადოების შეცდომაში შეყვანის, დეზინფორმაციის გავრცელების, გარკვეული საკითხებით მანიპულირების და ა.შ. ითქვა, თითქოს ის ვინც რეგისტრირდება - ამას შიშის გამო აკეთებს. თუმცა, იმ დროისთვისვე, რეგისტრაციის მსურველთა რიცხვი იყო ბევრად მაღალი ვიდრე მოსარჩელეთა რიცხვი, ვგულისხმობ არასამთავრობო ორგანიზაციებს. იყო მცდელობა რომ მათ ესაუბრათ მთელი საზოგადოების, მთელი ქვეყნის სახელით", - განაცხადა თამარ ტყეშელაშვილმა.

თამარ ტყეშელაშვილმა, სხდომაზე მოსარჩელე მხარის მხრიდან ბექა ძამაშვილის "ფეისბუქ" პოსტზე გაჟღერებული ინფორმაციაც გაიხსენა და აღნიშნა რომ სახელმწოფო ინტერესებით თამაში, წითელი ხაზია.

"რამდენჯერმე დაისვა საკითხი, თუ რა ელით იმ ორგანიზაციებს, ვინც ოკუპირებულ ტერიტორიებზე საქმიანობს? არაერთხელ გაეცა ამას პასუხი. ითქვა, რომ სახელმწიფო დგას გარანტად ამ თემის მგრძნობიარებიდან გამომდინარე. თუმცა შემდეგ, უკვე დასრულებულ სხდომაზე, ერთ-ერთმა მოსარჩელემ ბექა ძამაშვილის ფეისბუქ პოსტი გაიხსენა. თითქოს მან დაადანაშაულა კონკრეტული არასამთავრობოები არასწორ ქმედებებში და ა.შ. ჩვენთვის, როგორც სახელმწიფოსთვის არის წითელი ხაზი, როდესაც ხდება თამაში სახელმწიფო ინტერესების გამოყენებით. სწორედ ამიტომ, ჩვენ ვალდებული ვიყავით გვეთქვა, რომ სარჩელი იყო შეტანილი ერთ-ერთი არასამთავრობო ორგანიზაციის, კონკრეტულად "საიას" მიერ აგვისტოს ომის საქმეზე საქართველოს წინააღმდეგ",- განაცხადა თამარ ტყეშელაშვილმა.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი