2022-05-10 11:22:17, 1071 ნახვა

---

ლევან დავითაშვილი აშშ-ის საერთაშორისო განვითარების საფინანსო კორპორაციის აღმასრულებელ დირექტორს, სკოტ ნათანს შეხვდა

აშშ - ში სამუშაო ვიზიტის ფარგლებში, ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი აშშ - ის საერთაშორისო განვითარების საფინანსო კორპორაციის აღმასრულებელ დირექტორს სკოტ ნათანს შეხვდა - მხარეებმა ორი ქვეყნის ეკონომიკური თანამშრომლობის პრიორიტეტული მიმართულებები განიხილეს.

შეხვედრაზე აღინიშნა, რომ აშშ საქართველოს მთავარი სტრატეგიული პარტნიორია, ისეთი ორგანიზაციების მეშვეობით კი, როგორიცაა აშშ - ის საერთაშორისო განვითარების საფინანსო კორპორაცია DFC (ყოფილი OPIC), განხორციელდა საქართველოში არაერთი დარგის მხარდაჭერა, როგორიცაა, მათ შორის,  საფინანსო სექტორი, ტურიზმი, ჯანდაცვა, წარმოება, განახლებადი ენერგიის წყაროების განვითარება და სხვ. ითქვა, რომ კორპორაციამ ქვეყნის ეკონომიკაში 750 მლნ აშშ დოლარზე მეტი თანხის ინვესტირება განახორციელა და  ამჟამად 12 მოქმედ პროექტს ახორციელებს საერთო ღირებულებით 188 მლნ აშშ დოლარი.

გარდა ამისა, ყურადღება ასევე გამახვილდა აშშ - ის საერთაშორისო განვითარების საფინანსო კორპორაციის რეგიონული ოფისის თბილისში გახსნის მნიშვნელობაზე. აღინიშნა, რომ ქართული მხარე მიესალმება აღნიშნულ გადაწყვეტილებას და განიხილავს, როგორც აშშ - ის სტრატეგიული პარტნიორობის გამოვლინებას.

ამერიკული მხარის დიდი ინტერესი გამოიწვია შავი ზღვის ფსკერზე საქართველოსა და რუმინეთის დამაკავშირებელი ელექტროკაბელის პროექტმა, რომელიც საქართველოს და  ევროკავშირის ელექტროენერგეტიკულ სისტემებს ერთმანეთთან დააკავშირებს და მნიშვნელოვნად გაზრდის ქვეყნის ენერგეტიკულ დამოუკიდებლობას.

აღინიშნა, რომ საქართველო მოხარული იქნება, თუკი მეტი ამერიკული კომპანია იქნება წარმოდგენილი საქართველოში, ხოლო უფრო აქტიური თანამშრომლობა ისეთ სამთავრობო ორგანიზაციასთან, როგორიცაა აშშ - ის საერთაშორისო განვითარების საფინანსო კორპორაცია, ხელს შეუწყობს ამ მიზნის უფრო სწრაფად მიღწევას.  

მხარეები შეთანხმდნენ, რომ თანამშრომლობას გააგრძელებენ ტურიზმის, ინფრასტრუქტურისა და ენერგოუსაფრთხოების გაღრმავების მიმართულებით.

ამერიკულმა მხარემ კიდევ ერთხელ ხაზი გაუსვა ორ ქვეყანას შორის სტრატეგიული პარტნიორობის მნიშვნელობას და საქართველოს რეგიონული ჰაბის ფუნქციის განვითარებას.

აღსანიშნავია, რომ აშშ საქართველოს ეკონომიკის ერთ-ერთი მსხვილი ინვესტორია, საიდანაც განხორციელებულმა ინვესტიციებმა 1,8 მლრდ აშშ დოლარს გადააჭარბა. 2022 წლის 1 მარტის მონაცემებით, საქართველოში ამერიკული კაპიტალით 351 მოქმედი კომპანია ფუნქციონირებს და მოიცავს ისეთ სექტორებს, როგორიცაა ტრანსპორტი, კავშირგაბმულობა, საფინანსო სფერო, წარმოება, ინფრასტრუქტურა და უძრავი ქონება.

შეგახსენებთ, რომ ვიცე-პრემიერი, ეკონომიკისა და მდგრადი განვითარების მინისტრი, დელეგაციასთან ერთად  რამდენიმედღიანი სამუშაო ვიზიტით აშშ-ში იმყოფება. ლევან დავითაშვილმა შეხვედრები უკვე გამართა აშშ - ის საერთაშორისო განვითარების საფინანსო კორპორაციის აღმასრულებელ დირექტორთან სკოტ ნათანთან, აშშ-ის სავაჭრო წარმომადგენელთან ქეთრინ თაისთან   და აშშ-ის ექსპორტ-იმპორტ ბანკის ვიცე-პრეზიდენტთან, ჯუდიტ ფრაიორთან. დაგეგმილია ვიცე-პრემიერის შეხვედრები აშშ - ის კონგრესში, ასევე საერთაშორისო სავალუტო ფონდისა და აშშ-ის სახელმწიფო და კერძო სექტორის წარმომადგენლებთან. 

 

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი