2020-05-18 20:33:33, 1332 ნახვა

---

ჩიქოვანი - Covid-19-თან ეფექტურმა ბრძოლამ, საქართველოს მისცა შესაძლებლობა, ტურისტული მიზნებისთვის უსაფრთხო დანიშნულების სახელმწიფო ყოფილიყო

საქართველოს პრემიერ-მინისტრმა და მთავრობის წევრებმა მადლობა გადაუხადეს ჩვენი დიპლომატიური კორპუსის წარმომადგენლებს იმ სამუშაოსთვის, რომელიც მათ გაწიეს ჩვენი თანამოქალაქეების საქართველოში დაბრუნებისთვის.

საქართველო წარმატებულია არა მხოლოდ Covid-19-თან ბრძოლაში, არამედ საქართველო დღეს გახლავთ გამორჩეული სახელმწიფო, რომელმაც ძალიან ბევრი საკუთარი თანამოქალაქის დაბრუნება შეძლო სამშობლოში. ეს არის ძალიან მნიშვნელოვანი და  ამაში ძალიან დიდი წვლილი შეიტანეს ჩვენმა დიპლომატებმა და საკონსულო წარმომადგენლობებმა, მსოფლიოს მასშტაბით - ამის შესახებ საქართველოს პრემიერ-მინისტრის მრჩეველმა საერთაშორისო ურთიერთობების საკითხებში, პრემიერის პრესსპიკერმა ირაკლი ჩიქოვანმა განაცხადა.

მისივე თქმით, Covid-19-თან ეფექტიანმა ბრძოლამ და მისგან გამოწვეული რისკების მართვამ საქართველოს მისცა შესაძლებლობა, ყოფილიყო უსაფრთხო დანიშნულების სახელმწიფო ტურისტული მიზნებისთვის და ამ შესაძლებლობის გამოსაყენებლად ელჩებმა კონკრეტული ინსტრუქციები მიიღეს.

„საქართველოს მთავრობას არაერთხელ ჰქონდა გაცხადებული, რომ ის გამოწვევები, რომელიც Covid-19-მა მოიტანა, ასევე ქმნიდა შესაძლებლობებს. Covid-19-თან ეფექტიანმა ბრძოლამ და მისგან გამოწვეული რისკების მართვამ საქართველოს მისცა შესაძლებლობა, რომ ტრადიციულად ბრენდირებული თემების გარდა საქართველო ყოფილიყო ასევე უსაფრთხო დანიშნულების სახელმწიფო ტურისტული მიზნებისთვის. ეს არის ძალიან მნიშვნელოვანი შესაძლებლობა და ამ შესაძლებლობების გამოსაყენებლად ჩვენმა ელჩებმა მიიღეს კონკრეტული ინსტრუქციები. Covid-19-ის პანდემიამ და მასთან დაკავშირებულმა გამოწვევებმა ასევე მსოფლიოში დააყენა ახალი საკითხი, რომელიც დაკავშირებულია ბიზნესის რელოკაციასთან, ადგილსამყოფელი სახელმწიფოს ცვლილებასთან. საქართველო უნდა იქნას შეთავაზებული ამ ბიზნესებისათვის, როგორც შესაძლო დანიშნულების ადგილი, როგორც ქვეყანა, რომელშიც ძალიან ადვილი და მარტივია ბიზნესის წარმოება და ესაა დადასტურებული სხვადასხვა რეიტინგებში, არაერთი წელია. აგრეთვე, საქართველო არის ის სახელმწიფო რომელსაც აქვს თავისუფალი ვაჭრობის შეთანხმება ისეთ ბაზრებთან როგორიცაა ევროკავშირი, ჩინეთი და სხვა რაც რეალურად მიმზიდველს ხდის ბევრი ბიზნესისთვის ჩვენს ქვეყანას. ჩვენს ელჩებს და დიპლომატებს მიეცათ დავალება, რომ ამ მიმართულებით იმუშაონ ადგილსამყოფელ სახელმწიფოებში,"- აღნიშნა ირაკლი ჩიქოვანმა.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი