2021-08-19 15:36:11, 1222 ნახვა

---

ზურაბ უტიაშვილი - დარწმუნებული ვარ, რომ გურჯაანელებს პრობლემების დაძლევისა და ერთიანობის მაგალითის მიცემა ნამდვილად შეგვიძლია

14 აგვისტოს, საქართველოს პრემიერ-მინისტრმა ირაკლი ღარიბაშვილმა გურჯაანელებს, ქართული ოცნების მერობის კანდიდატი ზურაბ უტიაშვილი წარუდგინა.

პრემიერმა სიტყვით გამოსვლისას აღნიშნა, რომ ქართული ოცნების გურჯაანის მერობის კანდიდატი არის გამოცდილი მენეჯერი და მმართველი.

გადავწყვიტეთ, გაგვერკვია რა გამოცდილება აქვს ბატონ ზურას და როგორი გეგმები აქვს მუნიციპალიტეტის მართვასთან დაკავშირებით.

ზურაბ უტიაშვილმა თბილისის სახელმწიფო სამედიცინო უნივერსიტეტის დამთავრების შემდეგ, 24 წლიანი სამუშაო გამოცდილების ფარგლებში, სხვადასხვა უწყებაში, სხვადასხვა მაღალ პოზიციაზე იმუშავა. 2015 წლიდან დღემდე კი შ.პ.ს. ,,წმინდა მიქაელ მთავარანგელოზის სახელობის მრავალპროფილიანი კლინიკური საავადმყოფოს" დირექტორის პოზიციას იკავებს.

ქართული ოცნების გურჯაანის მერობის კანდიდატს, გარდა მდიდარი სამუშაო გამოცდილებისა, სხვადასხვა დროს მიღებული აქვს სახელმწიფო ჯილდოები, რომელთაგან როგორც თავად აღნიშნავს „განსაკუთრებით დიდი პასუხისმგებლობით სატარებელია რუსეთ-საქართველოს ომში მონაწილეობისთვის მიღებული „ღირსების ორდენი" და მედალი „განსაკუთრებული დამსახურებისა და გაწეული ღვაწლისთვის", რომელიც ომში დაჭრილთა და დაშავებულთათვის აღმოჩენილი დახმარებისა და სამედიცინო ევაკუაციის ორგანიზებისთვისდაიმსახურა.

2008 წლის ომის ვეტერანი ჩვენთან საუბარში აღნიშნავს, რომ „ყველაზე დიდი პასუხისმგებლობა ხალხის სამსახურში ყოფნაა".

„ჩემთვის, როგორც ექიმისთვის, ადამიანებზე ზრუნვა, პირველი რიგის შესასრულებელი ამოცანაა. მოხარული ვარ, რომ მომეცა საშუალება და ამჯერად, ამ დიდი პასუხისმგებლობის პარალელურად ჩემი მშობლიური გურჯაანის განვითარებასა და გურჯაანელებზე ზრუნვისთვისაც შევეცდები გამოვიყენო ჩემი შესაძლებლობების მაქსიმუმი. ბევრი მნიშვნელოვანი პროექტია განხორციელებული მუნიციპალიტეტში სხვადასხვა მიმართულებით, ბევრიც მიმდინარეა, რომელთაგან განსაკუთრებით სოფლის მეურნეობას, განათლების და ტურიზმის მიმართულებას გამოვყოფდი. ვფიქრობ, ჩვენი მთავარი ეკონომიკური სიძლიერე ამ დარგების სწორი, თანმიმდევრული და მიზნობრივი პოლიტიკის გატარების შედეგად იქნება და ამისთვის, აუცილებლად დავიხარჯები სათანადოდ, ჩემს მომავალ გუნდთან ერთად. გარდა ამისა, ჩვენ წინ დიდი გამოწვევა გვაქვს COVID-19 პანდემიის დაძლევის სახით, რომელსაც მოქალაქეობრივ თვითშეგნებასთან ერთად, ჩვენი მედპერსონალის დიდი შრომა სჭირდება, ამიტომ ერთად დგომა და ერთმანეთის დახმარება ახლა ისე გვჭირდება, როგორც არასდროს. დარწმუნებული ვარ, რომ გურჯაანელებს პრობლემების დაძლევისა და ერთიანობის მაგალითის მიცემა ნამდვილად შეგვიძლია,"- აღნიშნა ქართული ოცნების გურჯაანის მერობის კანდიდატმა.

ზურაბ უტიაშვილს, გარდა სახელმწიფო ჯილდოებისა, სხვადასხვა დროს მიღებული აქვს „მადლობა" საქართველოს შრომის, ჯანმრთელობისა და სოციალური დაცვის მინისტრისგან სხვადასხვა დამსახურებისთვის კრიზისების მართვის სფეროში (2006, 2008, 2009, 2010 წწ), საქართველოში აშშ ელჩისგან (2013წ) და სხვა.

აღსანიშნავია, რომ ქართული ოცნების გურჯაანის მუნიციპალიტეტის მერობის კანდიდატი ზურაბ უტიაშვილი საქართველოს პარლამენტის ჯანდაცვის კომიტეტის სამეცნიერო-საკოორდინაციო საბჭოს წევრია და საქართველოში COVID-19 პანდემიის მართვაში აქტიურად არის ჩართული.
 

 

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი