არჩილ ხაბაძე ბელარუს და ებრაელ ჟურნალისტებს შეხვდა

2015-08-06 12:58:15, 638 ნახვა

საზოგადოება

აჭარის მთავრობის თავმჯდომარე არჩილ ხაბაძე ბელარუსიდან და ისრაელიდან მოწვეულ ჟურნალისტებს შეხვდა.

აჭარის მთავრობის ადმინისტრაციის პრესსამსახურის ინფორმაციით, ორი ქვეყნის 18 მედიასაშუალების წარმომადგენელი რეგიონში აჭარის ტურიზმისა და კურორტების დეპარტამენტის მოწვევით პრესტურის ფარგლებში იმყოფებიან.

შეხვედრაზე სტუმრებს რეგიონის ტურისტული პოტენციალისა და საინვესტიციო გარემოს შესახებ პრეზენტაციები წარუდგინეს. ორსაათიანი შეხვედრა კითხვა-პასუხის რეჟიმში წარიმართა. არჩილ ხაბაძემ რეგიონში მიმდინარე სხვადასხვა საინვესტიციო პროექტებზე, ტურიზმის ახალი მიმართულებების განვითარებაზე, უცხოელ ინვესტორებთან თანამშრომლობაზე და ჟურნალისტების მხრიდან დასმულ სხვადასხვა შეკითხვებზე უპასუხა.

უცხოური მედიის წარმომადგენლები ტურისტულად აქტიურ სეზონს და ზაფხულის აქტივობებს გააშუქებენ. მედია ჯგუფების შემადგენლობაში შედიან ისრაელისა და ბელორუსიის როგორც ბეჭდური საშუალებების, ისე ტელევიზიისა და ინტერნეტ პორტალების ჟურნალისტები. მათ შორის : Tv Europa plus და რეიტინგული ინტერნეტ პორტალები tut.by holiday.by, onliner.by. ასევე ისრაელში წამყვანი სატელევიზიო არხის CH. 9-ის გადამღები ჯგუფი, რადიო “Rishon”-ის ჟურნალისტი და რემდენიმე ბლოგერი.

სტუმრები დაათვალიერებენ ქალაქის ღირშესანიშნაობებს, ბოტანიკურ ბაღს, მტირალას ნაციონალურ პარკს. გაეცნობიან ღვინის მარშრუტს, აჭარულ სამზარეულოსა და ტრადიციებს. აღსანიშნავია, რომ აჭარის ტურიზმის დეპარტამენტი წელს სარეკლამო ხასიათის პიარ-აქტივობებს არამარტო სეზონამდე პერიოდში, არამედ ივლისი-აგვისტოს ცხელ დღეებშიც ახორციელებს.