თამარ ბერუჩაშვილი: ყველა იმ საკითხზე ვმუშაობთ, რომელიც საერთაშორისო საზოგადოების მობილიზაციასთანაა დაკავშირებული

2015-03-18 12:30:08, 420 ნახვა

პოლიტიკა

რუსეთის ფედერაციასა და ოკუპირებულ სამხრეთ ოსეთს შორის დღეს დაგეგმილ „მოკავშირეობისა და ინტეგრაციის შესახებ" ე.წ. ხელშეკრულების ხელმოწერას საქართველოს საგარეო საქმეთა მინისტრი თამარ ბერუჩაშვილი რუსეთის მიერ საქართველოს ტერიტორიული მთლიანობის დარღვევად აფასებს.
ბერუჩაშვილის თქმით, საქართველოს საერთაშორისო თანამეგობრობის მხრიდან მტკიცე მხარდაჭერა აქვს.
"ეს არის რუსეთის მიერ საქართველოს ტერიტორიული მთლიანობის დარღვევის კიდევ ერთი ფაქტი, ასევე ყველა იმ საერთაშორიო ვალდებულების აღიარების წინააღმდეგ გადადგმული ნაბიჯი. ამასთან ერთად, ჩვენ მას განვიხილავთ როგორც ანექსიისკენ მიმართულ ქმედებას, ამის თაობაზე საქართველოს აქვს ძალიან მკაფიო მხარდაჭერა თავისი პარტნიორებისგან. ის ფაქტი, რომ ამ ხელშეკრულებას არანაირი სამართლებრივი ძალა არ აქვს, და ის, რომ ეწინააღმდეგება საერთაშორისო ნორმებს და პრინციპებს, ამის თაობაზე საერთაშორისო თანამეგობრობას, მთელ დემოკრატიულ საზოგადოებას აქვს ერთიანი მკაფიო პოზიცია. მათთან ვმუშაობთ ამ კონკრეტულ საკითხზე და ყველა კონკრეტულ საკითხზე, რომელიც საერთაშორისო საზოგადოების მობილიზაციასთანაა დაკავშირებული",-განაცხადა თამარ ბერუჩაშვილმა "რუსთავი2"-თან საუბრისას.
ცნობისთვის, რუსეთის ფედერაციასა და ოკუპირებულ სამხრეთ ოსეთს შორის „მოკავშირეობისა და ინტეგრაციის შესახებ" ე.წ. ხელშეკრულებას მხარეები დღეს მოსკოვში გააფორმებენ. ამის შესახებ განცხადება კრემლის ოფიციალურ გვერდზეა გამოქვეყნებული. მოკავშირეობისა და ინტეგრაციის შესახებ ხელშეკრულებას ხელს რუსეთის ფედერაციის პრეზიდენტი ვლადიმერ პუტინი და ოკუპირებული სამხრეთ ოსეთის პრეზიდენტი ლეონიდ თიბილოვი მოაწერენ. შეგახსენებთ, ე.წ. ხელშეკრულების გაფორმება 11 მარტს იგეგმებოდა, თუმცა გარკვეული მიზეზების გამო გადაიდო. აღნიშნულ ფაქტს რუსული მედია ვლადიმერ პუტინის ჯამრთელობასთან დაკავშირებულ პრობლემებს უკავშირებს, რადგან პუტინი 1 კვირაზე მეტი ხნის განმავლობაში საზოგადობის წინაშე არ გამოჩენილა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან