შუახევის მუნიციპალიტეტის მერმა პროფესორ ტარიელ ფუტკარაძის სახელობის სტიპენდიის კონკურსში გამარჯვებულ სტუდენტებს სტიპენდია გადასცა

2021-12-29 14:34:20, 2209 ნახვა

რეგიონი

შუახევის მუნიციპალიტეტის მერმა ომარ ტაკიძემ, მაღალმთიანი აჭარისა და ხელვაჩაურის მაჟორიტარ დეპუტატთან აჭარის უმაღლეს საბჭოში ფრიდონ ფუტკარაძესთან და მოადგილე რუსუდან შავაძესთან ერთად, ენათმეცნიერის, პროფესორ ტარიელ ფუტკარაძის სახელობის სტიპენდიის კონკურსში გამარჯვებულ სტუდენტებს სტიპენდია გადასცა და დამდეგი შობა-ახალი წელი მიულოცა.

შუახევის მერიის პრესსამსახურის ინფორმაციით, კონკურსი მიზანად ისახავს, სწავლაზე ორიენტირებული, მოტივირებული და წარმატებული სტუდენტების წახალისებას.

,,სტიპენდია, რომელიც ადგილობრივი თვითმმართველობის ინიციატივით წელს პირველად დაარსდა, განკუთვნილია მაღალი აკადემიური მოსწრების მქონე სტუდენტებისთვის. გვსურს, მათი მოტივაცია უფრო მეტად გაიზარდოს, ეს არის მოკრძალებული ინვესტიცია ჩვენსავე მომავალში. მათ უნდა შევუქმნათ გარემო უკეთესი კვალიფიკაციისა და განათლებისთვის. კონკურსში გამარჯვებულ ოთხ სტუდენტს, ერთჯერადად 500 ლარი სტიპენდია გადავეცით. კონკურსი მომავალ წელსაც გაგრძელდება და შევძლებთ უფრო მეტი სტუდენტის წახალისებას“- განაცხადა ომარ ტაკიძემ.