სასჯელაღსრულებისა და პრობაციის მინისტრის პირველ მოადგილედ თამარ ხულორდავა დაინიშნა

2015-09-22 17:39:00, 448 ნახვა

პოლიტიკა

სასჯელაღსრულებისა და პრობაციის მინისტრის კახა კახიშვილის პირველ მოადგილედ თამარ ხულორდავა დაინიშნა.

სასჯელაღსრულების სამინისტროს ინფორმაციით, პირველი მოადგილე თანამშრომლებს დღეს მინისტრმა პირადად წარუდგინა და აღნიშნა, რომ თამარ ხულორდავას საერთაშორისო ორგანიზაციებში მუშაობის დიდი გამოცდილება აქვს. იგი ბოლო წლებში საქართველოში ევროკავშირის წარმომადგენლობაში პროექტების მენეჯერის თანამდებობაზე მუშაობდა და სისხლის სამართლის სისტემის რეფორმისა და კანონის უზენაესობის სფეროში ევროკავშირის პროექტებს კურირებდა.
„ევროკავშირისა და ჩვენი სურვილები სისტემის ევროსტანდარტებთან მიახლოების თვალსაზრისით, ერთმანეთს ემთხვევა. აქედან და ასევე, თამარის გამოცდილებიდან გამომდინარე, შევთავაზეთ მას სასჯელაღსრულებისა და პრობაციის მინისტრის პირველი მოადგილის თანამდებობა. დარწმუნებული ვარ, ერთობლივი მუშაობით ეფექტური ტემპებით გავაგრძელებთ ყველა პროექტის განხორციელებას და მივიყვანთ ბოლომდე“, - განაცხადა კახა კახიშვილმა.
უწყების ცნობით, სასჯელაღსრულებისა და პრობაციის სამინისტროში თამარ ხულორდავა კურირებას გაუწევს პრობაციის ეროვნულ სააგანეტოს, სასჯელაღსრულებისა და პრობაციის სასწავლო ცენტრს, სამედიცინო და საერთაშორისო ურთიერთობების დეპარტამენტების მუშაობას. გარდა ამისა, მინისტრის პირველი მოადგილე საპარლამენტო მდივანიც იქნება.
„სასჯელაღსრულების სისტემა ჩემთვის უცხო არ არის. სამინისტროსთან ბოლო წლების განმავლობაში სისხლის სამართლის სისტემის რეფორმის მიმართულებით აქტიურად და მჭიდროდ ვთანამშრომლობდი. თუმცა ერთია, როცა რეფორმებზე გარედან საუბრობ, გაქვს კონკრეტული ხედვები და მოთხოვნები, მაგრამ მეორე და ძალიან მნიშვნელოვანია, როცა პირადად ახორციელებ და იღებ პასუხისმგებლობას შედეგებზე. პირველი მოადგილის თანამდებობა ჩემთვის გამოწვევა და ამავდროულად, დიდი პატივია. სრულად ვაცნობიერებ ჩემზე დაკისრებულ პასუხისმგებლობას და მადლობელი ვარ ნდობის გამოცხადებისთვის. სამინისტროს გუნდთან თანამშრომლობით, მაქსიმუმს გავაკეთებ იმისთვის, რომ სამინისტროს ყველა დასახული გეგმა და დაწყებული რეფორმა ბოლომდე იქნას მიყვანილი“, - განაცხადა თამარ ხულორდავამ.
თამარ ხულორდავა პროფესიით იურისტია. მას დამთავრებული აქვს თბილისის ივანე ჯავახიშვილის სახელობის სახელმწიფო უნივერსიტეტის იურიდიული ფაკულტეტი. გარდა ამისა, განათლება მიღებული აქვს შვედეთსა და გერმანიაში.
სასჯელაღსრულების და პრობაციის მინისტრის პირველი მოადგილის თანამდებობა მას შემდეგ იყო ვაკანტური, რაც ყოფილი პირველი მოადგილე კახა კახიშვილი სასჯელაღსრულებისა და პრობაციის მინისტრად დაინიშნა.