გიორგი პერტაიას შეფასებით, ბიძინა ივანიშვილის განცხადება, ბიზნესსექტორზე გავლენას ვერ მოახდენს

2015-06-05 14:37:54, 748 ნახვა

ეკონომიკა

საქართველოს ეროვნული საინვესტიციო სააგენტოს ხელმძღვანელის გიორგი პერტაიას მოსაზრებით, ეროვნული ბანკის პრეზიდენტთან დაკავშირებით, ყოფილი პრემიერ-მინისტრის, ბიძინა ივანიშვილის, გუშინდელი განცხადება, ბიზნესსექტორზე გავლენას ვერ მაოხდენს.
მისივე თქმით, ბიზნესისთვის მთავარია, პოლიტიკური გადაწყვეტილებები მას არ შეეხოს.
"სავალუტო ფონდის განცხადება არ მინახვს. ამას ძალიან დიდი გავლენა არ ექნება, რადგან ბიზნესმენები ძალიან პრაქტიკულები არიან. ჩვენ თუ ვლაპარაკობთ პოლიტიკასა და პოლიტიკოსებზე, ეს არის აბსოლუტურად სხვა. როდესაც ვლაპარაკობთ ბიზნესმენებზე, აქ მთავარია მოგება, გადასახადები; მთავარია, რომ მათ ბიზნესი არავინ წაართვას. დანარჩენები- ეს ყველაფერი არის პოლიტიკა, რომლებიც ბიზნესის ბუნებიდან გამომდინარე, მათ არ აინტერესებთ. შესაბამისად, რასაც თქვენ მეკითხებით, ბიზნესს არ ეხება",-განაცხადა გიორგი პერტაიამ.
საინვესტიციო სააგენტოს ხელმძღვანელის თქმითვე, იყო ზოგიერთი გაადწყვეტილება, რომლითაც ბიზნესი უკმაყოფილიყო დარჩა. პერტაიას განმარტებით, მაგალითად, უკმაყოფილება იყო ვიზებთან, მიწის მორატორიუმთან დაკავშირებით, თუმცა მისივე შეფასებით, მთავარია, მთავრობა ამ პრობლემებს ხედავს და ამაზე მუშაობს.
ცნობისთვის, საქართველოს ყოფილმა პრემიერ-მინისტრმა ბიძინა ივანიშვილმა გუშინ განაცხადა, რომ საერთაშორისო სავალუტო ფონდის წარმომადგენელმა მას პირადი შეხვედრისას სთხოვა, არ დაწყებულიყო სისხლის სამართლებრივი დევნა საქართველოს ეროვნული ბანკის ხელმძღვანელის მიმართ.
მისივე თქმით, პირადი გადაწყვეტილებით გამოიტანა განცხადება მთავარი პროკურატურიდან, რომელიც "ქართუ ბანკის" საქმეს უკავშირდებოდა. თუმცა, ივანიშვილის განმარტებით, ის ვერ შეძლებს გიორგი ქადაგიძის დაცვას, თუ მას სხვა საკითხებთან დაკავშირებით, რაიმე სახის გადაცდომა ექნება.