საქართველოს შეიარაღებული ძალების სამხედრო-საინჟინრო ბრიგადის EOD  ასეულის სამხედრო მოსამსახურეებისთვის ინსტრუქტორთა ტრენინგი გრძელდება.

თავდაცვის სამინისტროს ინფორმაციით, ტრენინგის მონაწილეები პრაქტიკულ მეცადინეობებს გადიან. დღეს, სასწავლო პროცესს  საქართველოში აკრედიტებული უცხო ქვეყნების თავდაცვის ატაშეები, საქართველოში ნატოს სამეკავშირეო ოფისისა და აშშ-ის საელჩოს წარმომადგენლები დაესწრნენ.

უცხოელი სტუმრები სწავლების მიმდინარეობას დააკვირდნენ და მის მნიშვნელობაზე ისაუბრეს.

„ძალიან მნიშვნელოვანი წვრთნაა. სწავლება ნატოს ნდობის ფონდის პროექტის ფარგლებში ხორციელდება, რომელიც სოფელ  სკრაში მდებარე საბრძოლო მასალების დაზიანებული საცავის გასუფთავებას ითვალისწინებს. ქართველი სამხედროების მომზადებას აშშ-ის ევროპული სარდლობის წარმომადგენლები ახორციელებენ. ისინი სწავლობენ ტექნიკას, თუ როგორ მოახდინონ აუფეთქებელი საბრძოლო მასალის გაუვნებელყოფა. ეს არის ევროპული სარდლობის მხარდაჭერა. საქართველო დაახლოებით 100 000 დოლარის ოდენობით დახმარებას მიიღებს, რათა ქართველმა სამხედროებმა უფრო ეფექტურად შეძლონ სოფელს სკრის ტერიტორიის გასუფთავება“, - განაცხადა ნატოს სამეკავშირეო ოფისის ხელმძღვანელმა უილიამ ლაჰიუმ.

სამხედრო საინჟინრო ბრიგადის EOD ასეულის სამხედრო მოსამსახურეებისთვის ტრენინგი 21 აპრილს დაიწყო და 8 მაისს დასრულდება. ნატოს „პარტნიორობა მშვიდობისათვის“ ნდობის ფონდის პროექტ „საქართველო IV“-ის ფარგლებში,  აშშ-ის ევროპული სარდლობის წარმომადგენლები (EUCOM) 15 სამხედრო მოსამსახურეს სამი კვირის განმავლობაში ამზადებენ. სწავლება სამხედრო-საინჟინრო ბრიგადის ბაზასა და ვაზიანის სამხედრო პოლიგონზე იმართება. ტრენინგი განაღმვით ოპერაციებში სამხედრო ინჟინრებით დაკომპლექტებული ასეულის შესაძლებლობების გაზრდას ისახავს მიზნად.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

რუსეთი სომხეთიდან ხილისა და ბოსტნეულის იმპორტს ზღუდავს

ირანის ელჩმა ყაველაშვილს თბილისის მეჩეთის მონახულების გამო მადლობა გადაუხადა

კალაძე გორში მომხდარ ძალადობაზე: ფაქტი არის ძალიან მძიმე - მნიშვნელოვანია, რომ შესაბამისმა სამსახურებმა რეაგირება მოახდინეს

კალაძე: ოპოზიციაში მიდის ბრძოლა - ვის ერქმევა მთავარი ოპოზიციური პარტია