2025-07-29 21:59:09, 6324 ნახვა

---

მინსკში პირველი დრონი ჩამოვარდა - „ტროტილითა და უკრაინულ ენაზე წარწერებით“, აცხადებს საგამოძიებო კომიტეტი

პირველი დრონი მინსკში სამშაბათს ღამით ჩამოვარდა. ბელარუსის თავდაცვის სამინისტრომ განაცხადა, რომ ქვეყნის დედაქალაქის თავზე უცნობი დრონი ჩამოაგდეს.

„29 ივლისს, საჰაერო თავდაცვის მორიგე ძალებმა ბელარუსის რესპუბლიკის საჰაერო სივრცეში აღმოაჩინეს და შეაჩერეს უცნობი საჰაერო სამიზნის ფრენა - საჰაერო სივრცის წესების დამრღვევი, რომელიც იდენტიფიცირებული იყო, როგორც უპილოტო საფრენი აპარატი (UAV). ელექტრონული ომის შედეგად, 02:33 საათზე, უპილოტო საფრენი აპარატი მინსკში, მატუსევიჩის ქუჩაზე, 72-ე სახლთან ახლოს ჩამოვარდა. მსხვერპლი არ მოჰყოლია“, - ნათქვამია თავდაცვის სამინისტროს პრესსამსახურის განცხადებაში.

ეს მინსკის თავზე დრონის პირველი გამოჩენა იყო, თუმცა ბელარუსის დამოუკიდებელი მედია ადრე იტყობინებოდა რუსული უპილოტო საფრენი აპარატების მიერ ბელარუსის საზღვრის გადაკვეთის შესახებ, რომლებიც უკრაინისკენ მიემართებოდნენ.

ბელარუსის რესპუბლიკის საგამოძიებო კომიტეტმა განაცხადა, რომ დრონის ჩამოვარდნასთან დაკავშირებით სისხლის სამართლის საქმე აღიძრა. მოწყობილობის ქობინი, რომლის ნამსხვრევებმაც რამდენიმე გაჩერებული მანქანა დააზიანა და საცხოვრებელი კორპუსის მიმდებარე ტერიტორიაზე დაეცა, როგორც აღინიშნა, აღჭურვილი იყო „ტროტილით და ლითონის ბურთულების სახით დიდი რაოდენობით დამრტყმელი ელემენტებით“.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი