ირანის პრეზიდენტი - უკრაინული თვითმფრინავის შეცდომით ჩამოგდების გამო, ყველა პირს დავსჯით

2020-01-14 13:28:56, 4556 ნახვა

მსოფლიო

ირანი უკრაინული სამგზავრო თვითმფრინავის შეცდომით ჩამოგდების გამო, ყველა პასუხისმგებელ პირს დასჯის, - ამის შესახებ ირანის პრეზიდენტმა, ჰასან როუჰანიმ სატელევიზიო მიმართვაში განაცხადა. აღნიშნულ ინფორმაციას სააგენტო „როიტერსი“ ავრცელებს.

ჰასან რიუჰანიმ თვითმფრინავის ჩამოგდებას „უპატიებელი შეცომა“ უწოდა და აღნიშნა, რომ ეს ტრაგიკული შემთხვევა გულდასმით იქნება გამოძიებული.

„ეს იყო უპატიებელი შეცდომა. თვითმფრინავის კატასტროფაზე მხოლოდ ერთი პირი ვერ იქნება პასუხისმგებელი. ირანის შეიარაღებული ძალების მიერ შეცდომის აღიარება პირველი კარგი ნაბიჯია. ჩვენ უნდა დავარწმუნოთ ხალხი, რომ ეს აღარ განმეორდება“, - განაცხადა ირანის პრეზიდენტმა.

შეგახსენებთ, რომ უკრაინის საერთაშორისო ავიახაზების კუთვნილი ბოინგ 737-ის ტიპის თვითმფრინავი, რომელიც რეისს კიევის მიმართულებით ასრულებდა, 8 იანვარს, აფრენიდან ორ წუთში ჩამოვარდა. შემთხვევის შედეგად 180-მდე პირი დაიღუპა. ირანელმა სამხედროებმა უკრაინის საერთაშორისო ავიახაზების „ბოინგის“ შეცდომით ჩამოგდება 11 იანვარს აღიარეს.

Patreon P მხარი დაუჭირე "ექსპრესნიუსს" →

ავტორი: ელენე გვიმრაძე, ექსპრესნიუსის რეპორტიორი 2018 წლიდან