2019-11-27 23:39:56, 1916 ნახვა

---

ივანიშვილი: ამერიკული ფულით დაფინანსებული NGO-ები ამერიკის წინააღმდეგ მოქმედებენ - არ გამოვრიცხავ კონგრესს ან სენატს მივმართო

„არ გამოვრიცხავ, რომ თუკი რაღაც დროში ვერ მოხერხდა ამაზე რეაქციის მიღება, რომ ამერიკული ფულით დაფინანსებული ორგანიზაციები, ამერიკის სახელმწიფოს წინააღმდეგ მოქმედებენ - საჯაროდ, ღია წერილით მივმართო კონგრესს ან სენატს, ან ორივეს და პრეზიდენტის ადმინისტრაციას“, - ამის შესახებ „ქართული ოცნების“ თავმჯდომარე ბიძინა ივანიშვილმა „იმედის“ ეთერში არასამთავრობო ორგანიზაციებზე საუბრისას განაცხადა.

როგორც მან აღნიშნა, ზოგიერთი ორგანიზაციის საქმიანობით ამერიკა-საქართველოს ურთიერთობები ზარალდება.

„გვაქვს პატარა გეგმები ამ მიმართულებით, რომ დავარწმუნოთ და კარგად ვაჩვენოთ ეს ვაშინგტონს, თუ რა ხდება აქ. თუ არ გამოვიდა ამ ხერხით, მე არ გამოვრიცხავ რომ საჯაროდ მივმართო ღია წერილით კონგრესს თუ გნებავთ, თუ გნებავთ სენატს და თუ გნებავთ პრეზიდენტის ადმინისტრაციას. საჯაროდ ავუხსნა რა ხდება აქ. როგორ ხდება ის, რომ ამერიკის ინტერესებს, ამერიკული ფულით დაფინანსებული ორგანიზაციები -  ნურავის ნუ ექნება ეიფორია და არც მე დავიბრალებ რომ ამერიკაზე ზრუნვით მისკდება თავი მაინც და მაინც. ამერიკა ზე-სახელმწიფოა და უჩემოდაც ძალიან კარგად ართმევს თავს თავის განვითარებას, რა თქმა უნდა, საქართველოა ჩვენთვის საფუძველი, რომ საქართველო და ამერიკა-საქართველოს ურთიერთობები ზარალდება ამ შემთხვევაში. მაგრამ მე კონკრეტულად მივწერ. აღარ ვიტყვი, რომ საქართველო ზარალდება ან საქართველოს და ამერიკის ურთიერთობები ზარალდება მათი ქცევით, - არა, პირდაპირ, ამერიკის ინტერესები, ამერიკის სახელმწიფოს ინტერესებს აზარალებენ ცალკეული ჩინოვნიკები, როდესაც ამერიკული ორგანიზაციების, ამერიკელი ამომრჩევლის მიერ დაფინანსებული ფულით, აბსოლუტურად ამერიკის სახელმწიფოს საპირისპირო პოლიტიკას ატარებენ. საპირისპიროა, რა თქმა უნდა. ყველასთვის გასაგებია დღეს, რომ „ნაციონალური მოძრაობა“ და სააკაშვილი არ ადარდებს ამერიკის სახელმწიფოს. ამერიკის სახელმწიფოს სტრატეგია არის პატარა პარტნიორი, მაგრამ გულწრფელი. ჩვენი გუნდი განუხრელად იცავს ამერიკულ ინტერესებს და ვერც ერთ მაგალითს ვერ მოიყვანენ რომ „ქართული ოცნების“ ვიღაც წევრი ამის საწინააღმდეგო რამეს აკეთებს. შეიძლება პატარა, პატარა მნიშვნელობის, მაგრამ ჩვენ განუხრელად და გულწრფელად ვიცავთ და ვატარებთ ამერიკულ ინტერესებს. ამ ფონზე, ამერიკის სახელმწიფოს საპირისპიროს აკეთებენ ეს ენ-ჯე-ო-ები, რომელიც კარგად გაგებულია და მსგავსი კვლევები. მე არ გამოვრიცხავ, რომ თუკი რაღაც დროში ვერ მოხერხდა ამაზე რეაქციის მიღება, რომ ამერიკული ფულით დაფინანსებული ორგანიზაციები, ამერიკის სახელმწიფოს წინააღმდეგ მოქმედებენ - მე არ გამოვრიცხავ რომ საჯაროდ, ღია წერილით მივმართო კონგრესს ან სენატს, ან ორივეს და პრეზიდენტის ადმინისტრაციას, რომ ასეთი სამწუხარო რეალობაა დღეს საქართველოში“, - განაცხადა ბიძინა ივანიშვილმა.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი