რუსთავის მე-5 საჯარო სკოლაში ხმაურია - მშობლები აქციას მართავენ

2019-09-30 10:11:52, 1024 ნახვა

საზოგადოება

რუსთავის მე-5 საჯარო სკოლაში ხმაურია. სკოლის მიმდებარე ტერიტორიაზე, მშობლები აქციას მართავენ და მე-6 კლასელი მოსწავლის გარიცხვას ითხოვენ.

კერძოდ, საქმე ეხება იმ მოსწავლეს, რომელსაც მუსიკის მასწავლებელი ფიზიკურ შეურაცხყოფასა და ბულინგში ადანაშაულებს. მასწავლებელი აცხადებს, რომ ბოლო პერიოდში გოგონა მას უთვალთვალებდა, შეურაცხყოფას აყენებდა და დასცინოდა. ერთ-ერთი ინციდენტის დროს, მასწავლებლის მტკიცებით, მოსწავლემ ის კიბიდან დააგორა, რის შემდეგადაც ნანა წიქარიშვილი [მასწავლებელი] კლინიკაში ტვინის შერყევით მოათავსეს.

დღეს მოსწავლეების ნაწილი სკოლაში არ გამოცხადდა, ნაწილი კი, პროტესტის ნიშნად გაკვეთილებზე შესვლაზე უარს აცხადებს. ადგილზე შეკრებილი მშობლები აცხადებენ, რომ გოგონა მათი შვილებისთვის საფრთხეს წარმოადგენს. ამასთან, სკოლის ეზოში სიტუაცია რამდენჯერმე დაიძაბა. ერთ-ერთი ასეთი ფაქტი მაშინ დაფიქსირდა, როდესაც ადგილზე გოგონას დედა გამოჩნდა. მასსა და სხვა მშობლებს შორის სიტყვიერი დაპირისპირება მოხდა. მშობელი მისი შვილის მიმართ გაჟღერებულ ბრალდებებს უარყოფს და მასწავლებელს ცილისწამებაში ადანაშაულებს. მისივე განცხადებით, ის სასამართლოში დავას აპირებს.

აღსანიშნავია, რომ ადგილზე რუსთავის მერი მივიდა. სკოლასთან ასევე იმყოფებიან პოლიციისა და სასწრაფო სამედიცინო სამსახურის თანამშრომლები.

ინფორმაციას [ფოტო/ვიდეო] "ინფო რუსთავი" 2 ავრცელებს.