ადვოკატი - სასამართლომ ე.წ. უდოს კომისიას დაავალა, ვანო მერაბიშვილის საკითხზე ხელახლა იმსჯელოს

2019-03-25 16:24:23, 1439 ნახვა

სამართალი

საქართველოს ყოფილი პრემიერ-მინისტრის ვანო მერაბიშვილის ადვოკატის გიორგი ჩივიაშვილის ინფორმაციით, სასამართლომ ვადაზე ადრე გათავისუფლების კომისიას დაავალა, მისი დაცვის ქვეშ მყოფის საკითხზე ხელახლა იმსჯელოს.

ჩივიაშვილის თქმით, იუსტიციის სამინისტროს გადაწყვეტილების გასაჩივრებისთვის 1-თვიანი ვადა ჰქონდა, რომელიც დღეს 15:00 საათზე ამოიწურა. ადვოკატის განმარტებით, ეს იმას ნიშნავს, რომ საქალაქო სასამართლოს მიერ 25 თებერვალს მიღებული გადაწყვეტილება ძალაში შევიდა.

„ეს გადაწყვეტილება არის უკვე კანონიერ ძალაში შესული. იუსტიციის სამინისტროს ის არ გაუსაჩივრებია სააპელაციო სასამართლოში. შესაბამისად, ვალდებულია ახლა ვადაზე ადრე განთავისუფლების კომისია იმსჯელოს კანონით დადგენილ ვადებში. როგორც წესი ეს ვადები არის თვის 25 რიცხვიდან შემდგომი თვის 5 რიცხვამდე და მოახდინოს ახალი სამართლებრივი აქტის გამოცემა. იმის გათვალისწინებით, რომ ვადაზე ადრე გათავისუფლების კომისიის სამართლებრივ აქტში ჩაწერილი საფუძვლები სასამართლოს მიერ იქნა მიჩნეული უსაფუძვლოდ, რჩება ერთადერთი გამოსავალი, რომ მათ იმსჯელონ დაუყოვნებლივ და გაათავისუფლონ მერაბიშვილი პატიმრობიდან,“-განაცხადა ვანო მერაბიშვილის ადვოკატმა გიორგი ჩივიაშვილმა.