იონათამიშვილი სტრასბურგის სასამართლოს გადაწყვეტილებაზე: როცა სიმართლე შენს მხარეს არის, მასშტაბებს მნიშვნელობა არ აქვს

2019-01-31 18:19:46, 1123 ნახვა

კომენტარი

„როცა სიმართლე შენს მხარეს არის, მასშტაბებს მნიშვნელობა არ აქვს. ამ დროს ყველაზე მთავარი - ადამიანის უფელბებისადმი ერთგუელბაა“, - ასე გამოეხმაურა საპარლამენტო უმრავლესობის წევრი რატი იონათამიშვილი სტრასბურგის სასამართლოს გადაწყვეტილებას საქმეზე „საქართველო რუსეთის წინააღმდეგ“.

როგორც დეპუტატი აცხადებს, ეს საქართველოსთვის ღირსების საქმე იყო, რითაც სამართლიანობის აღდგენასთან ერთად, საერთაშორისო დონეზე მნიშვნელოვანი პრეცედენტი შეიქმნა.

„ ადამიანის უფლებათა ევროპულმა სასამართლომ დღეს ძალიან მნიშვნელოვანი გადაწყვეტილება მიიღო - საქართველოს 1500 მოქალაქის სასარგებლოდ რუსეთს 10 მილიონი ევროს კომპენსაციის გადახდა დაეკისრა. ჩვენი ქვეყნისთვის ეს იყო ღირსების საქმე, რითაც სამართლიანობის აღდგენასთან ერთად, საერთაშორისო დონეზე შეიქმნა ძალიან მნიშვნელოვანი პრეცედენტი - პასუხს აგებს ყველა ხელისუფალი, ვინც უგულებელყოფს ადამიანის ფუნდამენტურ უფლებებს და/ან დაარღვევს საერთაშორისო სამართლის პრინციპებს.

მინდა განსაკუთრებული მადლობა ვუთხრა, საქართველოს იუსტიციის სამინისტროს, არა მხოლოდ იმიტომ, რომ ამ საქმეში ის იყო მთავარი მოპასუხე, არამედ - 2012 წლამდე სტრასბურგის სასამართლოში მხოლოდ 118 მოქალაქის მონაცემები იყო გაგზავნილი, 2014-2016 წ.წ. კი იუსტიციის სამინისტრომ მოიძია, დაამუშავა და 1500-ზე მეტი მოქალაქის მონაცემები გაუგზავნა სასამართლოს, რომელმაც, თავის მხრივ, მათი უფლებებიც თანაბრად აღიარა!

ვულოცავ ყველას, განსაკუთრები კი მათ, ვინც 2008 წელს რუსეთის ხელისუფლებისგან უშუალოდ დაზარალდნენ. როცა სიმართლე შენს მხარეს არის, მასშტაბებს მნიშვნელობა არ აქვს. ამ დროს ყველაზე მთავარი - ადამიანის უფელბებისადმი ერთგულებაა“, - წერს რატი იონათამიშვილი.

ცნობისთვის, დღეს სტრასბურგის სასამართლომ რუსეთს საქართველოს მოქალაქეების მასოვრივი დეპორტაციის გამო, 10 მილიონი ევროს გადახდა დააკისრა.