2018-11-15 14:06:50, 1490 ნახვა

---

„ვისაც დასჭირდება საცხოვრებლით უზრუნველყოფა, ყველას დავეხმარებით“ - ფონიჭალაში კალაძე და ხუციშვილი მივიდნენ

ფონიჭალაში, სადაც ერთ-ერთ კორპუსში აფეთქება მოხდა, თბილისის მერი კახა კალაძე და საგანგებო სიტუაციების მართვის სამსახურის ხელმძღვანელის მოვალეობის შემსრულებელი შალვა ხუციშვილი მივიდნენ. 

როგორც კახა კალაძემ განაცხადა, კორპუსი შემოწმდება, რათა დადგინდეს რამდენად უსაფრთხოა ის საცხოვრებლად და ვისაც საცხოვრებლით უზრუნველყოფა დასჭირდება, მერია მას დაეხმარება. მისივე განმარტებით, საჭიროების შემთხვევაში, შენობის გამაგრების სამუშაოებსდედაქალაქის მერია განახორციელებს. 

კალაძის თქმით, გვერდით კორპუსებში არანაირი პრობლემა არ არის, ხოლო დაზიანებული კორპუსიდან გამოყვანილ ადამიანებს სხვადასხვა მისამართებზე გადაიყვანენ. 

„სიტუაცია ძალიან მძიმეა. აფეთქება, სავარაუდოდ, ბუნებრივი აირის გამო მოხდა, თუმცა ზუსტი მიზეზი მოგვიანებით დადგინდება. დანგრეულია კორპუსის რამდენიმე სართული, არიან დაშავებულებიც. გაწმენდითი სამუშაოები ამ წუთებშიც მიმდინარეობს, სხვა ინფორმაცია ამ ეტაპზე პირადად მე არ მაქვს. გვერდით კორპუსებზე არანაირი პრობლემა არ არის. იმ კორპუსის მცხოვრებლები კი, სადაც აფეთქება მოხდა, საცხოვრებელი სახლებიდან არიან გამოყვანილი.მათ სხვადასხვა მისამართზე გადავიყვანთ. ამას გამგეობა და თბილისის მერია უზრუნველყოფს. ასევე, ჩვენ შევამოწმებთ, რამდენად უსაფრთხო იქნება ამ საცხოვრებელ კორპუსში ცხოვრება. თუ რაიმე დამატებითი სამუშაო იქნება ჩასატარებელი, მერია და გამგეობა ამას თავის თავზე აიღებს. ვისაც დასჭირდება საცხოვრებლით უზრუნველყოფა, ყველას დავეხმარებით“, - განაცხადა კახა კალაძემ.

ცნობისთვის, თბილისში, ზემო ფონიჭალაში, სავარაუდოდ, ბუნებრივი აირის აფეთქებამ საცხოვრებელი კორპუსის მე-3 და მე-4 სართულებზე ნგრევა გამოიწვია. აფეთქების შედეგად დაშავდა 3 ადამიანი. ისინი დამწვრობის ეროვნულ ცენტრში არიან გადაყვანილი. ცენტრის ხელმძღვანელის თქმით, მათი მდგომარეობა მძიმეა. დაშავებულის შორის ერთი 6 წლის ბავშვია. მომხდართან დაკავშირებით შსს-მ გამოძიება დაიწყო. 

---

ავტორი: ,

---

დღის თემა

მთავარი თემა

ინტერვიუ - ექსკლუზივი