ირაკლი ხმალაძე: ნინოშვილის ქუჩაზე სპორტული და დასასვენებელი სივრცე აუცილებლად მოეწყობა

2018-11-03 16:22:38, 1370 ნახვა

კომენტარი

თბილისის ვიცე-მერის ირაკლი ხმალაძის განცხადებით, კომპანია „m კვადრატის“ მიერ მერიაში წარმოდგენილი პროექტი ჯერჯერობით განხილული არ არის და დედაქალაქის მთავრობა მხოლოდ და მხოლოდ ქალაქის ინტერესებიდან გამომდინარე იხელმძღვანელებს.

როგორც ხმალაძემ განმარტა, საქმე ეხება, ერთი მხრივ, კომპანია „ცენტრ პოინტის“ მიერ დაზარალებულ მოსახლეობას და მეორე მხრივ, ნინოშვილის ქუჩის მცხოვრებთა სამართლიან მოთხოვნას - გამწვანდეს და კეთილმოეწყოს ტერიტორია.

"მინდა, მივმართო მოსახლეობას, ნუ ინერვიულებთ. ყველა იმ გარემოებას, რაც თქვენ გაღელვებთ, მერია ითვალისწინებს და მომავალშიც აუცილებლად გაითვალისწინებს. ნინოშვილის ქუჩაზე მდებარე აღნიშნული ნაკვეთი არის ის სივრცე, სადაც აუცილებლად მოეწყობა სპორტული და დასასვენებელი ფუნქციის რეკრეაციული სივრცე. ამის გარეშე, მერიისგან არაფრის ნებართვა გაიცემა.

ამ არეალში მაღალსართულიანი სახლების მშენებლობას არ დაუშვებთ. თუ ვინმე საპირისპიროს ამბობს, ეს არის დიდი ტყუილი და ამ პერიოდში მოსახლეობის პროტესტის პროვოცირება.

მინდა, საზოგადოებამ იცოდეს, რომ ამ კონკრეტულ მიწის ნაკვეთზე მხოლოდ დაბალი ინტენსივობის განაშენიანებაზე შეიძლება მსჯელობა. განვითარების საპირწონედ კი, განხორციელდება ყოფილი დეველოპერული კომპანია „ცენტრ პოინტის“ მიერ დაზარალებული 4000-ზე მეტი ოჯახის დაკმაყოფილება, რომლებიც წლებია, უსახლკაროდ არიან დარჩენილები. კიდევ ერთხელ მივმართავ მიმდებარე ტერიტორიაზე მცხოვრებ მოსახლეობას, ამ მიწაზე აუცილებლად განხორციელდება სპორტული მოედნების, სკვერის და სხვა რეკრეაციული დანიშნულების სივრცეების მოწყობა“, - განაცხადა ირაკლი ხმალაძემ.

ნინოშვილის ქუჩის მოსახლეობა კომპანია „m კვადრატის“ მიერ დაგეგმილ მშენებლობას აპროტესტებს და აღნიშნულ ტერიტორიაზე დასასვენებელი პარკის მოწყობას ითხოვს.

(NS)

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები