ნოდარ ხადური: ყველაზე მნიშვნელოვანია, ზედამხედველობის სამსახურის აბსოლუტური დამოუკიდებლობა უზრუნველყოფილი იყოს

2015-06-04 18:11:25, 354 ნახვა

პოლიტიკა

"ყველაზე მნიშვნელოვანია, უზრუნველყოფილი იქნეს ზედამხედველობის სამსახურის აბსოლუტური დამოუკიდებლობა",-ამის შესახებ ფინანსთა მინისტრმა ნოდარ ხადურუმა ჟურნალისტებს შეხვედრიდან გამოსვლის შემდეგ განუცხადა, სადაც დეპუტატები, საბანკო სექტორი და მთავრობის წევრები ეროვნული ბანკიდან საბანკო ზედამხედველობის სამსახურის გამოყოფის საკითხს განიხილავენ.
მისივე განცხადებით, ბიზნესსექტორის მხრიდან არის თხოვნა, რომ პროცესი საჯარო იყოს.
"ძალიან კარგი პროცესია დაწყებული, საბანკო სექტორი, პარლამენტის კომიტეტების თავმჯდომარეები, მთავრობის რამდენიმე წარმომადგენელი ვესწრებოდით და კონსტრუქციული საუბარი შედგა. ეს პროცესი გაგრძელდება ყველა ეტაპზე კანონპროექტის მიღებამდე. ყველაზე მნიშვნელოვანია, რომ უზრუნველყოფილი იქნეს ზედამხედველობის აბსოლუტური დამოუკიდებლობა. ამ მიმართულებით უნდა გადავდგათ სერიოზული ნაბიჯები. ბიზნესექტორის მხრიდან არის თხოვნა, რომ პროცესი იყოს საჯარო და მეტი არგუმენტები იყოს მოყვანილი. მოვიყვანეთ სხვადასხვა ქვეყნის მაგალითი, საფრანგეთის მაგალითი, სადაც ეს სამსახური დამოუკიდებელია. ასევე, სხვა მაგალითები, სადაც საბანკო ზედამხედველობა ცენტრალური ბანკის შემადგენლობაშია. თუ ჩვენ ვსაუბრობთ იმაზე, რომ სამსახური უფრო მეტად დამოუკიდებელი იყოს, მისი არგუმენტი, რომ არ იყოს დამოუკიდებელი, მგონი არ არსებობს",-განაცხადა ნოდარ ხადურმა.
ცნობისთვის, სასტუმრო „რედისონში“ „ეროვნული ბანკის შესახებ“ საქართველოს ორგანულ კანონში საქართველოს პარლამენტის წევრების მიერ ინიცირებული ცვლილებების თაობაზე შეხვედრა იმართება.
შეხვედრაში მონაწილეობას იღებენ კანონპროექტის ავტორები, პარლამენტის საფინანსო-საბიუჯეტო კომიტეტის თავმჯდომარე და მისი მოადგილე და საბანკო სფეროს წარმომადგენლები. შეხვედრას ასევე ესწრებიან საქართველოს მთავრობის წარმომადგენლები. შეხვედრა საქართველოს ბიზნესომბუდმენის შუამდგომლობით ტარდება.შეხვედრის მიზანია კანონპროექტის განხილვა და ბიზნეს სექტორის წარმომადგენლებისგან მოსაზრებების და წინადადებების მიღება.