სუბარი - არცერთი ფუნქცია, რომელსაც გაუქმებული სამინისტროები ასრულებდნენ, არ დაიკარგება

2018-06-26 14:50:10, 801 ნახვა

კომენტარი

„მთავარი არის ის, რომ არცერთი ფუნქცია, არც ერთი საქმე, რომელსაც ასრულებდნენ გაუქმებული სამინისტროები, არ დაიკარგება“, - ასე აფასებს ოკუპირებული ტერიტორიებიდან იძულებით გადაადგილებულ პირთა, განსახლების და ლტოლვილთა მინისტრი სოზარ სუბარი მთავრობის სტრუქტურულ ცვლილებებს.

სუბარმა მისი უწყების გაუქმებაზე ისაუბრა და აღნიშნა, რომ მცირე მთავრობის პირობებში ფუნქციების განხორციელება უფრო ეფექტურად მოხდება.

სტრუქტურული ცვლილებების მიზანი არის მცირე და უფრო ეფექტური მთავრობის ჩამოყალიბება. მთავარი არის ის, რომ არც ერთი ფუნქცია, არც ერთი საქმე, რომელსაც ასრულებდნენ გაუქმებული სამინისტროები, არ დაიკარგება, პირიქით, უფრო ეფექტურად მოხდება მათი განხორციელება. როდესაც ვლაპარაკობთ დევნილთა სამინისტროზე, ძალიან მნიშვნელოვანი იყო, ყველა ის ფუნქცია, რომელიც ამ სამინისტროშია, არ დაკარგულიყო და არ დაკარგულიყო სახელი, იმიტომ რომ ამ სახელთან ძალიან ბევრი რამ არის დაკავშირებული, კონკრეტულად იმ ვითარების ხაზგასმა, რომელშიც დღეს ჩვენი ქვეყანაა. შესაბამისად, შრომის, ჯანმრთელობისა და სოციალური დაცვის სამინისტროში იქნება ასახული ის ფუნქცია, რომელიც დევნილთა სოციალურ დახმარებებს ეხება. დევნილთა სოციალური დახმარების ძირითადი ნაწილი აქამდეც ჯანდაცვის სამინისტროს ფარგლებში ხორციელდება. ის 143 მილიონი ლარი, რომელსაც დევნილები ყოველთვიური დახმარების სახით იღებდნენ, სწორედ ჯანდაცვის სამინისტროდან გადიოდა და ბუნებრივია, რომ ეს კომპონენტი ჯანდაცვის სამინისტროს შეუერთდა ბინების განაწილების ფუნქციის ჩათვლით. მშენებლობა გადადის ინფრასტრუქტურის სამინისტროში, რადგან დევნილთა სამინისტროს გაუქმების შემდეგ, ბუნებრივია, ეს კომპონენტი უნდა წასულიყო იქ სადაც, უფრო მეტად ადეკვატური იქნებოდა. კიდევ ერთი მიმართულება, რომელსაც ჩვენი სამინისტრო ახორციელებს, ეს არის საერთაშორისო დაცვის მქონე პირებისთვის სტატუსის მინიჭიება. მსოფლიოში თითქმის ყველა ქვეყანაში ეს არის შინაგან საქმეთა ან იუსტიციის სამინისტროს ქვემდებარე. ჩვენს შემთხვევაში ჩაითვალა მიზანშეწონილად, რომ ეს კომპონენტი გადასულიყო შინაგან საქმეთა სამინისტროს ფუნქციებში. მიგრაციასთან დაკავშირებულ გარკვეულ ფუნქციებს დღემდე შინაგან საქმეთა სამინისტრო ასრულებდა და სრულიად ხელოვნურად იყო გაყოფილი ეს კომპონენტი ორ უწყებაში“, - განაცხადა სოზარ სუბარმა.

მისივე თქმით, კიდევ ერთი მნიშვნელოვანი კომპონენტი, რაზეც სამთავრობო ცვლილებებში საუბარი არ ყოფილა, უგზო-უკვლოდ დაკარგულ პირთა მოძიებაა.

„სამთავრობო ცვლილებებში ამაზე საუბარი არ ყოფილა, რადგან ამას საკანონმდებლო ცვლილება არ სჭირდება. უგზო-უკვლოდ დაკარგულ პირთა მოძიება ძალიან მნიშვნელოვანია ჩვენი თანამოქალაქეებისთვის, ბევრი იმ ადამიანისთვის, ვისაც შვილები თუ მშობლები აკლიათ და ეძებენ დღემდე. ეს კომპონენტი გადავა შერიგებისა და სამოქალაქო თანასწორობის საკითხებში სახელმწიფო მინისტრის აპარატში“, - განაცხადა სოზარ სუბარმა.