პრეზიდენტის ეკონომიკური მრჩეველის მაია მელიქიძის განცხადებით, "გაზპრომთან“ გაფორმებული ხელშეკრულებით, ქართულმა მხარემ  იმაზე გაუარესებული პირობები მიიღო, ვიდრე  აქამდე ჰქონდა. თუმცა,  როგორც მაია მელიქიძემ ტელეკომპანია „რუსთავი2“-ის ეთერში განაცხადა, საქართველოს გავლით სომხეთისთვის  გაზის მიწოდებას ამ ეტაპზე ტექნიკურად ალტერნატივა არ აქვს.

მაია მელიქიძე მიიჩნევს, რომ  „გაზპრომთან“ მოლაპარაკების პროცესი გაუმჭვირვალედ და ექსპერტების ჩართვის გარეშე არ უნდა განხორციელებულიყო:

„ჩვენ მივიღეთ იმაზე გაუარესებული პირობები, ვიდრე აქამდე ჰქონდა საქართველოს, საქართველო ცალსახად უალტერნატივოა იმასთან მიმართებაში, რომ სომხეთმა მიიღოს გაზი საქართველოს გავლით. იყო საუბარი, რომ ტექნიკურად ირანიდანაა შესაძლებელი, თუმცა მოგეხსენებათ, გუშინ შევხვდი ექსპერტებს და ფაქტია, რომ ტექნიკურად ეს ცოტა რთულია და ამ ეტაპზე შეუძლებელია.  ამიტომ, ძალიან მნიშვნელოვანია ამ ფაქტორის გამოყოფა. ეს მოლაპარაკებები მიმდინარეობდა გაუმჭვირვალედ, ანუ არ იყო საზოგადოებისთვის ცნობილი და ექსპერტები არ იყვნენ ამ პროცესში ჩართულნი. თავის დროზე, როცა გაფორმდა ხელშეკრულება „გაზპრომთან“, ჩართულნი იყვნენ მსოფლიო ბანკის ექსპერტები და რომ არა მსოფლიო ბანკის ექსპერტების რეკომენდაციები,საქართველო ვერ მიიღებდ იმას, რითაც სარგებლობდა აქამდე“,-განაცხადა მაია მელიქიძემ.

მისივე განმარტებით, პრეზიდენტის სურვილია,   გაიზარდოს  საზედამხედველო ფუნქცია პარლამენტის მხრიდან, ასევე საკანონმდებლო ორგანომ შეიმუშაოს  გეგმა, თუ როგორ მოხდება მოსალოდნელი რისკებისა და საფრთხეების მართვა:

„ამასთანავე,  წმინდა ეკონომიკურად, საქართველო ღებულობდა 10%-ს, დღეს უკვე მიიღებს ფულად ანაზღაურებას, რითაც შესაძლებელი იქნება მისი ნახევრის შესყიდვა. როდესაც ვსაუბრობთ, თუ რა ეკონომიკური ფაქტორები შეიძლებ ათან ახლდეს, ესაა ის, რომ იმ 5%-ს საიდან დააფინანსებს საქართველო? ეს იქნება ბიუჯეტიდან თუ საიდან? სწორედ ამიტომ, საქართველოს პრეზიდენტმა გამოთქვა სურვილი იმასთან დაკავშირებით, რომ  გაიზარდოს კონტროლი პარლამენტის მხრიდან და ასევე შემუშავდეს კონკრეტული სამოქმედო გეგმა  იმაზე, თუ რა რისკები იქნება  ხელისუფლების შეხედულებით და როგორ უნდა იმართებოდეს ეს რისკები“,-აღნიშნა პრეზიდენტის ეკონომიკურმა მრჩეველმა.

შეგახსენებთ, რომ საქართველოს მთავრობამ სომხეთში ბუნებრივი აირის ტრანზიტთან დაკავშირებით, „გაზპრომ-ექსპორტის“ საბოლოო წინადადება განიხილა და მასთან ხელშეკრულების გაფორმების გადაწყვეტილება მიიღო.

კერძოდ, მხარეები შეთანხმდნენ, რომ ტრანზიტის საფასურს "გაზპრომი" საქართველოს ნედლეულის ნაცვლად, ფულადი სახით აუნაზღაურებს.

მიღწეული შეთანხმებების თანახმად, რუსული მხარე 2017-2018 წლებში საქართველოს ტერიტორიის გავლით სომხეთში წელიწადში 2,0-2,2 კუბური მეტრიგაზი მიეწოდება. გარდა ამისა, საქართველო 2016 წელთან შედარებით გაზს შეღავათიანი პირობებით მიიღებს. კერძოდ კი 1000 კუბურ მეტრში 30 აშშ დოლარით ნაკლები ტარიფით.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

SJC: 17 მაისი საქართველოში „ოჯახის“ იდეის პოლიტიკური ინსტრუმენტალიზაციის სიმბოლური დღეა

ელენე ხოშტარია - ხალხის სიმრავლე და ვერც დრო, ვერ წაშლის 2013 წლის 17 მაისს ჩადენილ ბოროტებას

შიო მესამე - თუ ოჯახში ტრიალებს მძიმე ცოდვა, ისეთი როგორიც არის, მაგალითად, აბორტი, მაშინ ბედნიერებას ვერ ააშენებ, განწირულია ასეთი ოჯახი

დიუშენის დაავადების მქონე ბავშვების მშობლები: „გადავარჩინოთ ჩვენი შვილები“