საქართველო-ისრაელის ბიზნეს პალატის მოწვევით, დღეს თბილისს ისრაელიდან 22-კაციანი დელეგაცია ეწვევა, რომლის შემადგენლობაში არიან ისრაელის ქნესეთის წევრები, პრემიერ-მინისტრ ბენიამინ ნეთანიაჰუს პარტიის, “ლიკუდის” ხელმძღვანელი პირები, ქნესეთის თავმჯდომარის კანცელარიის ხელმძღვანელი, ისრაელის სხვადასხვა ქალაქის მერიის წარმომადგენლები, ბიზნესმენები და საზოგადო მოღვაწეები.

როგორც "ექსპრესნიუსს" საქართველო-ისრაელის ბიზნეს პალატიდან აცნობეს, დელეგაცია ხვალ პირველ შეხვედრას თბილისში, ისრაელის სახლში გამართავს, სადაც საქართველო-ისრაელის ბიზნეს პალატის პრეზიდენტი, ისრაელის სახლის დამფუძნებელი იციკ მოშე სტუმრებს ისრაელის სახლის საქმიანობას გააცნობს და დელეგაციის წევრ ოფიციალურ პირებს ბიზნეს პალატის ინიციატივით მიმართავს. აღნიშნული ინიციატივის თანახმად ქართულ მხარესთან შეთანხმებით, ქართველ მშენებლებს სპეციალური კვოტა გამოეყოთ, რათა გარკვეული დროის განმავლობაში ისრაელში მოხდეს მათი ოფიციალურად დასაქმება.

ვინაიდან ამჟამად სხვადასხვა შუამავლების წყალობით, ქართველ მშენებლებს ისრაელში სამუშაოდ წასვლა, თანაც არალეგალურად, სოლიდური თანხა უჯდებათ. როგორც იციკ მოშე აღნიშნავს, თუ ისრაელი საქართველოს გამოუყოფს 500-კაციან კვოტას, ეს ქართული ოჯახებისთვის სერიოზული ფინანსური წყარო იქნება, ხოლო საქართველო უახლოეს მომავალში 500 მაღალკვალიფიციურ მშენებელს მიიღებს.

ბიზნეს პალატის ინფორმაციით, ამ ინიციატივას იციკ მოშე საქართველოს ხელისუფლებას გააცნობს. დაგეგმილია მისი და ისრაელის დელეგაციის შეხვედრა ვიცე-პრემიერთან, ეკონომიკის მინისტრ დიმიტრი ქუმსიშვილთან, სადაც საუბარი აგრეთვე ისრაელ-საქართველოს ეკონომიკური ურთიერთობების გაღრმავებას შეეხება.

შეხვედრა აგრეთვე კულტურის მინისტრ მიხეილ გიორგაძესთან გაიმართება. ისრაელის წარმომადგენლობითი დელეგაცია ხვალვე თბილისის ცენტრში ებრაული ინვესტიციით მშენებარე ხუთვარსკვლავიან სასტუმრო „რიქსოსს“ ეწვევა, როგორც ისრაელური ინვესტიციის სიმბოლოს.
აღნიშნული სასტუმრო დელეგაციის წევრებისათვის იქნება იმის ნათელი დადასტურება, თუ რაოდენ კვალიფიციურად შეუძლიათ მუშაობა ქართველ მშენებლებს. სტუმრებს დაგეგმილი აქვთ თბილისის ღირსშესანიშნაობების დათვალიერება და საქართველოს ტურისტული პოტენციალის გაცნობა.

დელეგაცია საქართველოს 2 აპრილს დატოვებს. 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

პაპუაშვილი სოციალურ ქსელებში ცენზურაზე - ვისაც იხუტებს ბრიუსელი, ისინი ცდილობენ ზიზღის დათესვას

რუსი ოკუპანტების მიერ უკანონოდ დაკავებული საქართველოს 2 მოქალაქე თავისუფალია

კობახიძე სოციალურ ქსელებში ცენზურაზე - სახელმწიფო უზრუნველყოფს ეფექტიან რეაგირებას

ბაქო - თბილისი - ყარსის ახალი სარკინიგზო მონაკვეთი სრულ ექსპლუატაციაში შევიდა