საქართველოს ახალგაზრდა იურისტთა ასოციაციის ცნობით, საერთაშორისო ორგანიზაცია - Media Defence ადამიანის უფლებათა ევროპულ სასამართლოში რუსული კანონის წინააღმდეგ საქმეში მესამე მხარედ ჩაერთო.

საია-ს თანახმად, 2 სექტემბერს Media Defence-მა ადამიანის უფლებათა ევროპულ სასამართლოში მესამე მხარის წერილობითი პოზიცია წარადგინა.

საია წერს:

"Media Defence-ის წერილობითი პოზიციის მიხედვით, რუსული კანონით გათვალისწინებული შეზღუდვები ხელს უშლის მედია საშუალებებისა და ჟურნალისტების საჯარო დებატებში ჩართვას, სამოქალაქო საზოგადოების საქმიანობის გაგრძელებას, იწვევს მათ სტიგმატიზებას და, ასევე, აქვს მსუსხავი ეფექტი. სასამართლომ ხაზგასმით აღნიშნა, რომ სახელმწიფოს აქვს პოზიტიური ვალდებულება, შექმნას შესაბამისი საკანონმდებლო და ადმინისტრაციული ჩარჩო ეფექტიანი პლურალიზმის უზრუნველსაყოფად. სხვა რეპრესიულ ზომებთან ერთად, ამ ტიპის კანონებს აქვს შესაძლებლობა, საბოლოოდ გამოიწვიოს დამოუკიდებელი მედიის გაქრობა. შესაბამისად, ამ საქმეს გადამწყვეტი მნიშვნელობა აქვს საქართველოში მედია საშუალებებისა და ჟურნალისტებისთვის.

Media Defence-ის შეფასებით, საქართველოში მოქმედ „რუსულ კანონს“, რუსეთში მიღებული „უცხოეთის აგენტების“ შესახებ კანონებსა და სხვა ქვეყნებში მიღებულ კანონებს ერთი, საერთო ფოკუსი აერთიანებს, რაც ადამიანის უფლებების დამცველი სამოქალაქო საზოგადოების ორგანიზაციებისა და მთავრობის მიმართ კრიტიკულად მომუშავე დამოუკიდებელი მედიის სტიგმატიზაციასა და დისკრედიტაციისკენ არის მიმართული.

Media Defence-ის წერილობითი პოზიციის მიხედვით, ამ კანონმდებლობის დამანგრეველი გავლენა არასამთავრობო ორგანიზაციებსა და მედია საშუალებებზე Ecodefence-ისა და Kobalya-ს გადაწყვეტილებებში იყო აღწერილი. „რუსული კანონის“ გავლენა, სავარაუდოდ, მსგავსი იქნება.

ასევე, უნგრეთის მთავრობის მცდელობა, შემოეღო „უცხოეთის აგენტის“ ტიპის მსგავსი კანონი, ევროპის კავშირის სამართლის სადამფუძნებლო სამართლის ნორმების დარღვევად იქნა მიჩნეული. კერძოდ, ევროპული კავშირის მართლმსაჯულების სასამართლომ აღნიშნა, რომ შესაბამისი კანონების „შინაარსმა და ერთობლივმა ეფექტმა“ მასტიგმატიზირებელი გავლენა იქონია ორგანიზაციებზე, რომლებსაც კანონი შეეხო და უბიძგა მათ, აღარ გაეგრძელებიათ თავიანთი საქმიანობა.

Media Defence-ის შეფასებით, რუსული კანონით გათვალისწინებული მონიტორინგის ასპექტი თითქმის დარწმუნებით ნიშნავს ჟურნალისტურ წყაროებთან ურთიერთობის წესის ცვლილებას. კანონმდებლობის შეუსრულებლობისთვის სანქციების დაწესების რისკის გამო, სარედაქციო ავტონომია ირღვევა. ადამიანის უფლებათა ევროპულმა სასამართლომ განმარტა „უცხოური აგენტების“ მოქმედებით გამოწვეული „მსუსხავი ეფექტი“ საჯარო დისკურსსა და სამოქალაქო ჩართულობაზე. კერძოდ, მსუსხავი ეფექტი“ წარმოადგენს ჩარევას არა მხოლოდ მედიის გამოხატვის თავისუფლების უფლებაში, არამედ მედიის მსმენელთა/აუდიტორიის უფლებაში, თავისუფლად მიიღოს ინფორმაცია, რომელიც ჩვეულებრივ გავრცელდებოდა მათი საქმიანობის ფარგლებში.

გარდა ამისა, Media Defence-მა თავისი წერილობითი მოსაზრება ადამიანის უფლებათა ევროპული კონვენციის, მე-14 მუხლის (დისკრიმინაციის აკრძალვა) ფარგლებშიც დააფიქსირა. კერძოდ, იმ შემთხვევაშიც კი, თუ ჩაითვლება, რომ არსებობს მიზეზობრივი კავშირი დაწესებულ შეზღუდვებსა და გამჭირვალობის მიზანს შორის, არ ჩატარებულა გამოკვლევა იმის დასადგენად, არსებობს თუ არა ნაკლებად შემზღუდავი ალტერნატივები. შესაბამისად, საკითხი, არსებობს თუ არა ლეგიტიმური მიზანი, მოითხოვს უმკაცრეს შემოწმებას, ფუნდამენტური უფლებების გათვალისწინებით. სანამ არ არსებობს ობიექტური და შესაბამისი გამართლება, რისი დადგენაც ზემოთ აღნიშნული „უცხოეთის აგენტების“ ტიპის კანონებთან მიმართებით რთულია, მოპყრობაში განსხვავება უკანონო დისკრიმინაციას წარმოადგენს".

ავტორი: ექსპრესნიუსი,

სოციალური ქსელები

რუსეთის ძალებმა დნეპრისა და ოდესის საცხოვრებელ შენობებს იერიში მიიტანეს, რის შედეგადაც 20 ადამიანი დაშავდა

თბილისი პრაიდი: "ოცნებამ" სცადა, ქვიარ ადამიანები საზოგადოებრივი ცხოვრებიდან გავექრეთ

SJC: 17 მაისი საქართველოში „ოჯახის“ იდეის პოლიტიკური ინსტრუმენტალიზაციის სიმბოლური დღეა

ელენე ხოშტარია - ხალხის სიმრავლე და ვერც დრო, ვერ წაშლის 2013 წლის 17 მაისს ჩადენილ ბოროტებას