კალაძე ხმის მიცემისას - ზრდილობა ხომ არსებობს, ეთიკა ხომ არსებობს, მესმის, რომ არც ერთი გაგაჩნიათ,

2025-10-04 10:47:55, 1003 ნახვა

პოლიტიკა

ქართული ოცნების თბილისის მერობის კანდიდატმა კახა კალაძემ არჩევნებზე ხმა მისცა. ის საარჩევნო უბანზე მარტო მივიდა.

ხმის მიცემის შემდეგ ჟურნალისტებთან კომენტარი გააკეთა და თქვა, რომ მშვიდობის შენარჩუნება ქვეყანაში - "ერთადერთ ძალას, ქართულ ოცნებას შეუძლია".

კომენტარისას ის ამტკიცებდა, რომ ქვეყანაში დაცულია "სიტყვისა და გამოხატვის თავისუფლება", ჟურნალისტის ჩაკითხვაზე კი, რაში გამოიხატება ეს, მას ზრდილობა დაუწუნა და კითხვებს არ უპასუხა.

"სიტყვის და გამოხატვის თავისუფლება არის დაცული, ნებისმიერ ადამიანს შეუძლია... რაღაც ზრდილობა ხომ არსებობს, ეთიკა ხომ არსებობს, მესმის, რომ არც ერთი გაგაჩნიათ, არც მეორე, თუ მაცლით... კარგით, მადლობა", - თქვა მან.

როგორც კახა კალაძემ ხმის მიცემის შემდეგ განაცხადა, ერთადერთი პოლიტიკური ძალა, რომელსაც შეუძლია, ქვეყანაში მშვიდობა შეინარჩუნოს და დედაქალაქის განვითარება განაგრძოს, „ქართული ოცნება-დემოკრატიული საქართველოა".

„გავაკეთე ჩემი არჩევანი. პირველი, რა თქმა უნდა, მშვიდობა საქართველოს, მეტი სიკეთე თბილისს. ერთადერთი ძალა, ვისაც დღეს რეალურად შეუძლია, ქვეყანაში მშვიდობა შეინარჩუნოს, ეს არის „ქართული ოცნება-დემოკრატიული საქართველო"; ერთადერთი ძალა, ვისაც რეალურად შეუძლია, ქალაქის განვითარება განაგრძოს, „ქართული ოცნება-დემოკრატიული საქართველოა". ჩვენ ბოლო წლების განმავლობაში ბევრი სასიკეთო, მნიშვნელოვანი პროექტი განვახორციელეთ დედაქალაქისთვის აბსოლუტურად ყველა მიმართულებით, თუმცა რჩება გამოწვევები, პრობლემები.

საზოგადოებას საარჩევნო კამპანიის ფარგლებში, წარვუდგინეთ კონკრეტული ხედვები, თუ რა პროექტების განხორციელება იგეგმება თუნდაც ინფრასტრუქტურის, ეკოლოგიური მიმართულებით; გაგრძელდება ჯანდაცვისა და სოციალური პროგრამები; განხორციელდება ახალი პროექტები ტრამვაის, მეტროს სახით; მოეწყობა ატრაქციონების პარკი და ა.შ. ძალიან ბევრი გვაქვს სალაპარაკო, ბევრ პროექტზე მივაწოდეთ საზოგადოებას ინფორმაცია. რა თქმა უნდა, მომდევნო ოთხი წელი იქნება საინტერესო და მნიშვნელოვანი ჩვენი დედაქალაქისთვის", - განაცხადა კახა კალაძემ.