თბილისში მდებარე სავაჭრო ცენტრებში, რომლებზეც საქართველოში აშშ-ის საელჩომ საკუთარი მოქალაქეებისთვის გამაფრთხილებელი განცხადება გაავრცელა, ევაკუცია არ გამოცხადებულა და სავაჭრო ცენტრები მუშაობას ჩვეულ რეჟიმში აგრძელებენ.

როგორც საქართველოს პირველ არხს „ისთ ფოინთის“ მარკეტინგის დირექტორმა, თეიკო ლომინაძემ განუცხადა, სავაჭრო ცენტრი ინფორმაციის მიღებისთანავე მოქმედებს შესაბამისი სახელმწიფო ორგანოების პროტოკოლით.

„ჩვენმა უსაფრთხოების სამსახურმა ეს ინფორმაცია გაიგო შესაბამისი სახელმწიფო ორგანოებისგან და იმ წუთიდანვე მათი პროტოკოლით ვმოქმედებდით. ევაკუაცია არ გამოცხადებულა, რადგან ასეთი ინსტრუქცია არ ყოფილა. მუქარის შემცველი რაიმე ელექტრონული მეილი ან შეტყობინება სავაჭრო ცენტრში არანაირი ფორმით არ ყოფილა შემოსული. არაფერი არ არის აღმოჩენილი ტერიტორიაზე. ახლა როგორც ვიცი, სამართალდამცველებმა დატოვეს ტერიტორია“, – განაცხადა ლომინაძემ.

ამასთან, „გალერია თბილისის“ საზოგადოებასთან ურთიერთობის სამსახურის ხელმძღვანელის, ნინი ადუაშვილის თქმით, სავაჭრო ცენტრში აღნიშნულ საკითხთან დაკავშირებით არანაირი სახის ინფორმაცია არ შესულა.

„ჩვენც იმავე არხიდან გავიგეთ აღნიშნული ინფორმაცია და შესაბამისად, გადავეცით უკვე შესაბამის სამსახურებს ინფორმაცია. საქმის კურსში არიან და ველოდებით მათგან შესაბამის დავალებებს. ამ ეტაპზე სავაჭრო ცენტრში ევაკუაცია არ განხორციელებულა და მეტ დამტებით ინფორმაციას ჩვენ არ ვფლობთ. შეიძლება, ნებისმიერ წუთს მოგვცენ შესაბამისი დავალება. სამართალდამცველები ამ ეტაპზე ადგილზე არ არიან, თუმცა ამოწმებენ ჯერ ინფორმაციის სისწორეს და შემდეგ უკვე მიიღებენ შესაბამის ზომებს“, – აღნიშნა ადუაშვილმა.

ცნობისთვის, საქართველოში აშშ-ის საელჩომ საკუთარი მოქალაქეებისთვის გამაფრთხილებელი განცხადება გაავრცელა, სადაც აღნიშნულია, რომ საელჩომ თბილისის სამ სავაჭრო ცენტრში ბომბის აფეთქების საფრთხის შესახებ შეიტყო.

აშშ-ის საელჩოს მიერ გავრცელებულ გამაფრთხილებელ განცხადებასთან დაკავშირებით სახელმწიფო უსაფრთხოების სამსახურში კომენტარი გაკეთდა. როგორც საქართველოს პირველ არხს უწყებაში განუცხადეს, უწყების შესაბამისი სამსახურები მუშაობენ მორიგი ცრუ შეტყობინების ფაქტზე.

ამასთან, სუს-მა გაავრცელა განცხადებაც, სადაც მოუწოდებს საქართველოში აკრედიტებულ დიპლომატიურ წარმომადგენლობებს, „პატივი სცენ უსაფრთხოებაზე პასუხისმგებელი სამსახურების საქმიანობას, გამოიჩინონ მეტი პასუხისმგებლობა და თავი შეიკავონ შესაბამის უწყებებთან შეუთანხმებელი განცხადებების გავრცელებისგან“.

ავტორი: ექსპრესნიუსი,

სოციალური ქსელები

თბილისი პრაიდი: "ოცნებამ" სცადა, ქვიარ ადამიანები საზოგადოებრივი ცხოვრებიდან გავექრეთ

SJC: 17 მაისი საქართველოში „ოჯახის“ იდეის პოლიტიკური ინსტრუმენტალიზაციის სიმბოლური დღეა

ელენე ხოშტარია - ხალხის სიმრავლე და ვერც დრო, ვერ წაშლის 2013 წლის 17 მაისს ჩადენილ ბოროტებას

შიო მესამე - თუ ოჯახში ტრიალებს მძიმე ცოდვა, ისეთი როგორიც არის, მაგალითად, აბორტი, მაშინ ბედნიერებას ვერ ააშენებ, განწირულია ასეთი ოჯახი