ჯგუფური ძალადობის მუხლით დაკავებული 11 ბრალდებულის საქმეები სააპელაციო სასამართლოში მიდის. ოლიგარქის პირადი ტყვეების პატიმრობის კანონიერების საკითხი დღეიდან სააპელაციო სასამართლომ უნდა განიხილოს. ადვოკატები უკვე მიიღეს გადაწყვეტილებები.

იურისტები აღნიშნავენ, რომ ის, რაც პროკურორებმა გამორჩათ, დასაბუთების ნაწილში არ ჩაწერეს, რას ედავებოდნენ ახალგაზრდებს, თავად მოსამართლემ ჩაწერა. ქეთევან ჯაჭვაძემ აღკვეთის ღონისძიების არშეცვლისას გადაწყვეტილებაში მითითება გააკეთა, რომ შესაძლოა დაკავებულები მიმალულიყვნენ და ხელოვნურად განეცადათ არარსებული დანაშაული.

ანდრო ჭიჭინაძის ადვოკატი, თორნიკე მიგინეიშვილი, აღნიშნავს, რომ ქეთევან ჯაჭვაძის გადაწყვეტილება, რომლის მიხედვითაც მისი დაცვის ქვეშ მყოფი პატიმრობაში რჩება, არ შეესაბამება არც ერთ სამართლებრივ სტანდარტს.

„საქმეში არც დაზარალებული არსებობს და დღემდე ვერც ერთი პირი ვერ მოიყვანა პროკურატურამ, რომელზეც შეიძლება რაიმე სახის გავლენა მოახდინოს ანდრო ჭიჭინაძემ. ამიტომ, ის სამართლებრივი საფუძვლები, რომლის გამოც შეიძლება, რომ უკიდურესი ფორმა, თავისუფლების აღკვეთა მიუსაჯო ადამიანს, ვერცერთ სტანდარტში ვერ ჯდება, ვერც საქართველოს და ვერც ევროპული კანონმდებლობით. რა თქმა უნდა, გადაწყვეტილებას გავასაჩივრებთ. რამდენიმე საათში უკვე შევა ის სააპელაციო სასამართლოში და ვნახოთ, დაველოდოთ გადაწყვეტილებას. იმის გამო, რომ სამართლებრივად და ფაქტობრივად საქმე იძლევა შესაძლებლობას, რომ ანდრო ჭიჭინაძე გათავისუფლდეს, მაინც მოლოდინი არსებობს, რომ შესაძლოა სააპელაციო სასამართლოში ერთ-ერთი მოსამართლის სინდისმა გაიღვიძოს და ობიექტურად შეაფასოს ეს გარემოებები. თუმცა, თუ დავუკვირდებით, როგორ მიდის პროცესი, დაკმაყოფილების შანსი საკმაოდ დაბალი არის“, - განაცხადა თორნიკე მიგინეიშვილმა.

უკანონო გადაწყვეტილებაზე საუბრობს ონისე ცხადაძის ადვოკატიც. შოთა თუთერიძე პირდაპირ აცხადებს, რომ აღნიშნული უკანონოდ დაკავებული ახალგაზრდების დასჯას ემსახურება.

„ამ პოლიტიკური პატიმრების საქმესთან დაკავშირებით, ისე, როგორც ყველა სხვა პოლიტპატიმრის საქმესთან დაკავშირებითაც, რა თქმა უნდა, იქნა მიღებული უკანონო, დაუსაბუთებელი და პოლიტიკურად მოტივირებული გადაწყვეტილება, რაც ამ პატრიოტების მიმართ შურისძიებასა და ძალაუფლების დემონსტრირებას ისახავს მიზნად, მათ შორის, ჩემი დაცვის ქვეშ მყოფი, ონისე ცხადაზის მიმართაც. ჩვენ მოლოდინი არ გვაქვს, რომ მურუსიძის სასამართლო რაიმე ტიპის ობიექტურ გადაწყვეტილებას მიიღებს არსებულ პირობებში. მაინც, ბუნებრივია, ვაპირებთ გასაჩივრებას და საჩივარი კანონით გათვალისწინებულ ვადაში შევა სააპელაციო სასამართლოში“, - განაცხადა შოთა თუთერიძემ.

შეგახსენებთ, რომ ანდრო ჭიჭინაძე, ონისე ცხადაძე და კიდევ 9 პირი მოსამართლე ქეთევან ჯაჭვაძემ წინასწარ პატიმრობაში დატოვა. ვერდიქტი მოსამართლემ 10 იანვრის პროცესზე გამოიტანა, რასაც დარბაზში ხმაური მოყვა.

ავტორი: ექსპრესნიუსი,

სოციალური ქსელები

სი ძინპინმა განაცხადა, რომ ჩინეთ-ჩრდილოეთ კორეის ურთიერთობები ახალ ისტორიულ ეტაპზე შევიდა

AI განათლება მომავლის შესაძლებლობებისთვის: თიბისისა და GAIA-ს ერთობლივი ინიციატივები

სტუდიო ლიბერთი Global Tech Weekend Tbilisi 2026-ის მთავარი პარტნიორია

მოსკოვში ავტომობილის აფეთქების შედეგად მოკლული გენერალი დამირ დავიდოვია, რომელიც სარაკეტო და არტილერიის დირექტორატის ხელმძღვანელობდა