დამიზნებით გვესროდა - ჯერ საბურავები და მერე გამიზნული სროლა,- ასე იხსენებს რუსეთის საოკუპაციო ძალების უკანონო პატიმრობიდან გათავისუფლებული ლევან დოთიაშვილი 6 ნოემბერს მომხდარს, როდესაც ოკუპანტებმა გორის მუნიციპალიტეტის სოფელ კირბალის მიმდებარედ საქართველოს მოქალაქე თამაზ გინტური მოკლეს.

დოთიაშვილმა მედიის წარმომადგენლებთან მცირე კომენტარი გააკეთა და განაცხადა, რომ უკანონო დაკავების შემდეგ, საოკუპაციო ძალების წარმომადგენელი მას ფიზიკურად გაუსწორდა.

"რა მოხდა, არ ვიცი. ჩვენ მანქანაში ვისხედით, შეიძლება, დაგვიძახა, რომ არ წახვიდეთ - ყოველ შემთხვევაში, ჩვენ არ გაგვიგია და მოგვდევდა სროლით, ბევრი გაისროლა...

მე თვითონ ვნახე ნატყვიარები. [თამაზ გინტურს] ზურგის არეში ჰქონდა მოხვედრილი. ერთი თქვა - დამჭრაო და მოგარტყა-მეთქი? - და კიო. გადავედი მე მანქანიდან, გადმოვიყვანე. ამ დროს ამოვიდნენ დანარჩენი რუსი ჯარისკაცები და მე წამიყვანეს ტყის მიმართულებით... 7 ამოვიდა სადღაც 5-6 წუთის შემდეგ. თამაზი რომ გადმოვიყვანე [მანქანიდან], სასწრაფოში რომ დავრეკე და ყველას რომ გავაგებინე, იმის შემდეგ 7 მოვიდა... პირდაპირ სროლით მოდიოდა ჩვენს უკან ცეცხლსასროლი იარაღით და სათამაშოდ რომ არ მოდიოდა რაღა თქმა უნდა... გზაში იყო შეურაცხყოფაც, დარტყმაც - ზოგი კონდახით, ზოგი ხელით, მაგას ნამდვილად ვეღარ ვიგებდი უკვე",- განაცხადა დოთიაშვილმა. 

შეგახსენებთ, 6 ნოემბერს, გორის მუნიციპალიტეტის სოფელ კირბალის მიმდებარედ, რუსეთის საოკუპაციო ძალების წარმომადგენლებმა საქართველოს მოქალაქე თამაზ გინტური მოკლეს და ლევან დოთიაშვილი უკანონოდ დააკავეს. უკანონო პატიმრობაში მყოფი დოთიაშვილი გუშინ, 9 ნოემბერს გაათავისუფლეს.

ავტორი: ექსპრესნიუსი,

სოციალური ქსელები

სოფელ წინაკვერკვეში მეწყრული პროცესები ვითარდება

ზელენსკი: მივიღეთ ცნობები, რომ რუსეთი ჩვენ წინააღმდეგ ორეშნიკის გამოყენებისთვის ემზადება

ჩეხეთის პრეზიდენტმა რუსეთს ინტერნეტთან კავშირის გათიშვა შესთავაზა.

დიუშენის კუნთოვანი დისტროფიის მქონე ბავშვების დასახმარებლად უკვე 1 300 000 ლარი შეგროვდა - მარათონი გრძელდება