2023-09-22 16:58:22, 690 ნახვა

---

გომელაური - 2020 წლიდან მეხანძრე-მაშველის საშტატო ერთეული გადაკეთდა ოფიცრის საშტატო ერთეულად, რითაც უზრუნველყოფილ იქნა მეხანძრე-მაშველთა როგორც პროფესიული ზრდა

2020 წლიდან რიგითის სპეციალური სახელმწიფო წოდების მქონე 2900 მეხანძრე-მაშველის საშტატო ერთეული გადაკეთდა ოფიცრის საშტატო ერთეულად, შესაბამისად, უმაღლესი განათლების მქონე მეხანძრე-მაშველებს მიენიჭათ ოფიცრის პირველადი სპეციალური წოდება, რითაც უზრუნველყოფილ იქნა მეხანძრე-მაშველთა როგორც პროფესიული ზრდა, ასევე წოდებრივი სარგოს მატება, - ამის შესახებ შინაგან საქმეთა მინისტრმა, ვახტანგ გომელაურმა საკანონმდებლო ორგანოში შოვის ტრაგედიასთან დაკავშირებით, ინტერპელაციის წესით სიტყვით გამოსვლისას განაცხადა.

შინაგან საქმეთა მინისტრის თქმით, სახანძრო-სამაშველო დანაყოფებისათვის ქვეყნის მასშტაბით თანამედროვე სტანდარტების არაერთი შენობა აშენდა, ხოლო მიმდინარე ეტაპზე, დამატებით 5 შენობის მშენებლობა მიმდინარეობს.

„სამსახურში განხორციელებული რეფორმის შედეგად, 2020 წლიდან რიგითის სპეციალური სახელმწიფო წოდების მქონე 2900 მეხანძრე-მაშველის საშტატო ერთეული გადაკეთდა ოფიცრის საშტატო ერთეულად, შესაბამისად, უმაღლესი განათლების მქონე მეხანძრე-მაშველებს მიენიჭათ ოფიცრის პირველადი სპეციალური წოდება, რითაც უზრუნველყოფილ იქნა მეხანძრე-მაშველთა როგორც პროფესიული ზრდა, ასევე წოდებრივი სარგოს მატება. საგანგებო სიტუაციების მართვის სამსახურში ცალკე მიმართულებად გამოიყო წყალზე სამაშველო განყოფილება, მყვინთავთა ჯგუფი.

რაც შეეხება მეხანძრე-მაშველების კვალიფიკაციას, 2019-2023 წლებში საერთაშორისო ეგიდით სხვადასხვა ქვეყნებში (აშშ, იაპონია, ავსტრია, პოლონეთი, იტალია, შვედეთი, ბელგია, გერმანია, ესტონეთი, თურქეთი, სამხრეთ აფრიკა) გამართული სასწავლო კურსების მეშვეობით საგანგებო სიტუაციების მართვის სამსახურის 800-მდე თანამშრომელი გადამზადდა, ისეთი მნიშვნელოვანი მიმართულებებით, როგორიცაა კრიზისების მართვა, ხანძრების მართვა, ურბანული სამძებრო-სამაშველო, წყალზე სამაშველო, მაღაროებში სამაშველო, სიმაღლეზე სამაშველო სამუშაოები და ქიმიური, ბიოლოგიური, რადიაციული და ბირთვულ ინციდენტებზე რეაგირების სამუშაოები.

სახანძრო-სამაშველო ძალების საერთაშორისო სტანდარტებთან თავსებადობას ადასტურებს ასევე ის პოზიტიური საერთაშორისო შეფასებები, რაც მოჰყვა მიმდინარე წელს, მეზობელ თურქეთში მომხდარი დამანგრეველი მიწისძვრის დროს, ჩვენი მაშველების მიერ ჩატარებულ სამაშველო სამუშაოებს, რა დროსაც ისინი სამაშველო ღონისძიებას ახორციელებდნენ თავიანთი აღჭურვილობით და ტექნიკით.

რაც შეეხება სამაშველო ვერტმფრენების საკითხს, არაერთხელ გავაცანით საზოგადოებას ჩვენი გეგმებისა და კონკრეტული ღონისძიებების შესახებ.

საპარლამენტო განხილვის ფორმატშიც მოგახსენეთ უკვე და კიდევ გაგიმეორებთ, რომ საქართველოს მთავრობასთან კოორდინაციით, 3 ახალი შვეულმფრენის შესყიდვის მიზნით, ფრანგულ კომპანია "ეარბას ჰელიკოპტერ"-თან ხელშეკრულება გაფორმდა 2022 წლის 19 დეკემბერს. შვეულმფრენები, რომლებსაც სამინისტრო ყიდულობს, არის მრავალფუნქციური და შეუძლია შეასრულოს საპოლიციო, სატრანსპორტო, სამძებრო და სამაშველო ოპერაციები. პირველ ვერტმფრენს  სამინისტრო უახლოეს 6 თვეში მიიღებს“, - აღნიშნა ვახტანგ გომელაურმა.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი